Dünyanın ən böyük avtomobil və elektrikli avtomobil bazarı olan Çində sənaye nəhəngi BYD-nin həftə sonu başlatdığı böyük qiymət endirimləri yeni qiymət müharibəsinə səbəb olub. Maraqlısı budur ki, BYD-nin bu addımı təkcə özünün deyil, həm də rəqib avtomobil istehsalçılarının səhmlərini aşağı salıb.
Şirkət 20-dən çox modeli əhatə edən yeni endirim dalğasına start verib. Ən diqqətçəkən endirim BYD-nin ən ucuz modeli və ən çox satılan modeli olan Seagull-da edilib. Qlobal miqyasda da diqqət çəkən modelin qiyməti 20% azalaraq 55 800 yuana (təxminən 7 780 dollar) düşüb. Ən böyük endirim ikimühərrikli Seal hibrid sedanında edilib. Avtomobilin qiyməti 53 000 yuan (34%) azalaraq 102 800 yuana (14 200 dollar) düşüb. BYD-nin qiymət dəyişikliyindən sonra şirkətin Honq-Konqda satılan səhmləri təxminən 9%, Geely 7%, Li Auto 5% və Xpeng 4% itirib. Buna görə də, bu endirimlər sektorun bütün oyunçularına təsir edən dalğalanma effekti yaradıb.
Təkcə özəl sektor deyil, dövlət avtomobil istehsalçıları da tez cavab veriblər. Changan, Deepal brendi altında təklif olunan SUV modelinə 15%-ə qədər nağd endirim tətbiq edilib. Stellantis tərəfindən dəstəklənən Leapmotor isə həftə sonu C16 və C11 modellərində müvafiq olaraq 28% və 30% qiymət endirimləri elan edib. Hazırda Çində elektrik avtomobil satışları ümumi satışların 50%-nə yaxınlaşır. Çinin sürətli yüksəlişinin əsas səbəbi ucuz elektrik avtomobilləridir. Sektor əvvəllər də bir neçə dəfə qiymət müharibələri ilə üzləşib və bu, elektrikli avtomobillərin qiymətlərini davamlı olaraq aşağı salıb.
