Elon Musk-ın AI Grok süni intellekt aləti Telegram platformasına gəlir. Belə ki, Telegram təsisçisi Pavel Durov Grok AI-nin bazarda ən yaxşı süni intellekt texnologiyası olduğunu və bu yay 1 milyard Telegram istifadəçisi üçün əlçatan olacağını bildirib.
Durovun sözlərinə görə, Telegram istifadəçiləri bazarda ən yaxşı süni intellekt texnologiyasına çıxış əldə edəcəklər. Grok AI Telegram-ın axtarış çubuğuna inteqrasiya olunacaq və aktual söhbətlər, ağıllı mətn redaktəsi, söhbət xülasəsi, sənədlərin xülasəsi, qrup söhbətlərinin moderasiyası və s. təklif edəcək. Ümumiyyətlə, Telegram yeniliklər ilə ayaqlaşmağı çox sevir və bu xüsusiyyəti şirkətin hazırda milyardlarla istifadəçi kütləsinə sahib olmasına da imkan verib. İndi təqdim ediləcək yenilik də məhz son dövrlərin ən çox sevilən texnologiyası olan süni intellekt çatbotlarının platformaya inteqrasiyası olacaq.
Qeyd edək ki, Durov, xAI şirkəti ilə ortaqlığı 300 milyon dollar gəlir və kapital təmin edəcəyini bildirib. Maraqlısı budur ki, bu iki şirkət Telegram-da satılan xAI abunələrindən əldə olunan gəliri də bərabər şəkildə bölüşəcəklər. Durov, Telegram Premium-un 15 milyondan çox pullu abunəçiyə çatdığını və bu rəqəmin cəmi bir il ərzində iki dəfə artdığını bildirib. Görünən odur ki, Telegram-ın pullu abunəçilərinin sayı süni intellekt inteqrasiyası ilə birlikdə daha da artacaq.
