Astana Hub, Google for Startups ilə tərəfdaşlıq çərçivəsində Mərkəzi Asiyada inkişaf mərhələsində olan texnologiya startapları üçün tanınmış lider olan Silkway Accelerator proqramının altıncı kohortuna müraciətləri qəbul etməyə başlayıb. Proqram Özbəkistan, Qazaxıstan, Qırğızıstan, Tacikistan, Türkmənistan, Gürcüstan, Azərbaycan və Monqolustandan olan startap komandaları üçün açıqdır.
Müraciətlər iyunun 2-dək bu keçid vasitəsilə qəbul olunacaq.
Son üç il ərzində Silkway Accelerator təxminən 1300 müraciət alıb və onların arasından Mərkəzi Avrasiyadan olan 62 startap proqramı uğurla başa vurub. Onların arasında Azərbaycandan olan üç startap da var: Tripsome.com — valideynlərə uşaqlar üçün təhsil yönümlü fəaliyyətlərə çıxış imkanı verən platforma; Metatesk — Metaverse və VR texnologiyalarından istifadə edən immersiv təhsil həlli; və Voiceloft — 110 dili dəstəkləyən, mövcud alternativlərdən 10 dəfə sürətli və 100 dəfə ucuz olan nitqin tanınması texnologiyası. Bu startaplar satışda, sövdələşmələrin sürətində və gəlirdə əhəmiyyətli artım əldə ediblər, 30-dan çox yerli tərəfdaşla müqavilə imzalayıblar və sabit aylıq gəlirə nail olublar.
“Silkway Accelerator iştirakçıları mentorlar, ekspertlər və investorlardan ibarət qlobal şəbəkəyə çıxış əldə edir və güclü beynəlxalq icmanın bir hissəsinə çevrilirlər. Proqram komandaların məhsulun inkişafına tam fokuslanması üçün nəzərdə tutulub – gündəlik hipotezlərin test olunması, metrikaların yaxşılaşdırılması və inkişafın növbəti mərhələsinə çatmaq. Altıncı kohortda iştirak edən startaplar həmçinin Astana Hub Ventures-dən investisiya almaq hüququna malik olacaqlar. Proqram Digital Bridge 2025 forumunda keçiriləcək Demo Günü ilə başa çatacaq və burada iştirakçılar nailiyyətlərini investorlar, korporasiyalar və qlobal texnoloji ekosistemin nümayəndələrinə təqdim edəcəklər,”
– deyə Astana Hub-un Biznes Proqramlar Ofisinin direktoru Yerbol Axmetov bildirib.
PMF və ya Ölçülmə mərhələsində işlək məhsulu olan və Astanada 12 intensiv həftəyə tam şəkildə həsr olunmağa hazır olan texnologiya startapları müraciət etməyə dəvət olunur. Proqram çərçivəsində strukturlaşdırılmış izləmə, pulsuz ofis sahəsi və kolivinq imkanları, mentorluq, beynəlxalq şəbəkələşmə imkanları, PR dəstəyi və investisiya potensialı təklif olunur.
Bu günə qədər Silkway Accelerator proqramında iştirak etmiş startaplar 28 milyon dollardan çox investisiya cəlb ediblər. Məzunların ümumi dəyəri 500 milyon dolları keçib və onlar BƏƏ, Türkiyə, ABŞ və digər bazarlara genişləniblər. Nüfuzlu məzunlara Citix, Zypl.ai, Arlan Biotech, NB Fit, UvU, ApartX, Biometric, ZebraEye, Alaqan və başqaları daxildir.
Birinci, ikinci, üçüncü, dördüncü və beşinci kohortların nəticələri barədə daha ətraflı məlumatı astanahub.com saytından əldə edə bilərsiniz.
Məlumat üçün:
Google for Startups — Google tərəfindən 2011-ci ildə istifadəyə verilmiş startap dəstəyi təşəbbüsüdür. O, 125 ölkədə 50-dən çox kavorkinq məkanını və akseleratorları birləşdirir və erkən mərhələli sahibkarlar üçün praktik təlimlər təqdim edir.
Astana Hub — texnologiya biznes ekosisteminin inkişafı, texnoloji mütəxəssislərin hazırlanması və startapların dəstəklənməsi məqsədi daşıyan Mərkəzi Asiyanın ən böyük texnoparkıdır. Hal-hazırda Astana Hub-da 1650 texnologiya şirkəti qeydiyyatdan keçib, onlardan 440-ı xarici iştirakla fəaliyyət göstərir.
