ABŞ-nin Agility Robotics şirkəti insanlarla eyni mühitdə təhlükəsiz işləmək üçün hazırladığı yeni Digit 5 humanoid robotunu təqdim edib. Robotun əsas xüsusiyyəti ətrafındakı insanları aşkar edərək hərəkətlərini onların təhlükəsizliyinə uyğun dəyişməsidir. Şirkət Digit 5-in anbar və fabriklərdə qoruyucu qəfəslərə ehtiyac olmadan işləməsini hədəfləyir.
Digit 5 uzaqdan insan aşkar etdikdə istiqamətini dəyişə və ya həmin şəxsin keçməsi üçün dayana bilir. İnsan robota daha çox yaxınlaşdıqda isə o, çömələrək oturma vəziyyətinə keçir. Bu davranış robotun insanlarla birgə işlədiyi mühitlərdə mümkün toqquşma risklərini azaltmaq üçün nəzərdə tutulub.
Robot ətraf mühiti analiz etmək üçün süni intellekt alqoritmlərindən və görüntü əsaslı sensorlardan istifadə edir. Onun hesablama sistemində Nvidia IGX Thor avadanlığı və robotların təhlükəsizliyinə yönəlmiş Nvidia Halos proqram təminatı yer alır.
Yeni modelin yükdaşıma imkanları da artırılıb. Təkmilləşdirilmiş ayaq konstruksiyası sayəsində Digit 5 təxminən 22,7 kiloqramlıq yükləri təkrar-təkrar qaldıra bilir. Robotun boyu 180 santimetr, maksimum çatma hündürlüyü isə 2,19 metrdir. Əvvəlki Digit 4 modelində bu göstərici 1,68 metr idi. Bu dəyişiklik robotun daha hündür rəflərlə işləməsinə imkan yaradır.
Digit 5 bir enerji dolumu ilə 90 dəqiqə işləyə bilir. Batareyasının yenidən doldurulması isə cəmi 9 dəqiqə çəkir. Agility Robotics-in məlumatına görə, qısa enerji doldurma fasilələri sayəsində robot sutka ərzində 20 saatdan çox işləyə bilər.
Robotun dəyişdirilə bilən tutucu sistemi müxtəlif tapşırıqlara uyğun mexaniki əllərin quraşdırılmasına imkan verir. Şirkət gələcəkdə yeni süni intellekt bacarıqları əlavə etməklə Digit 5-in yüklərin daşınması, qablaşdırılması və rəflərə yerləşdirilməsi kimi əməliyyatlarda istifadəsini genişləndirməyi planlaşdırır.
Agility Robotics humanoid robotların kommersiya istifadəsi sahəsində artıq müəyyən təcrübəyə malikdir. Şirkət 2024-cü ildə Atlantadakı GXO anbarında Digit robotlarını tamştat kommersiya əməliyyatlarına cəlb edib. Əvvəlki modellər Şimali Amerikadakı anbar və fabriklərdə ümumilikdə 65 min saatdan çox işləyib. GXO, Schaeffler, Amazon və Toyota Motor Manufacturing Canada bu robotlardan istifadə edən şirkətlər sırasındadır.
Digit 5 üçün erkən müştəri çıxışının 2027-ci ilin birinci yarısında açılması, ümumi satışların isə həmin ilin sonunadək başlaması planlaşdırılır. Şirkət yeni modelin istehsalı üçün ABŞ-də yerləşən RoboFab zavodunu da yenidən təşkil edir.
