Xiaomi firmasının Redmi K50 Ultra təqdimatında yaxınlaşmaqda olan Xiaomi 12T Pro modelinə xeyli istinad etmişdik. Həmin məqaləni saytımızdan oxuya bilərsiniz. Əgər həmin məqalə ilə tanışsınızsa Xiaomi 12T Pro və Redmi K50 Ultra modeli arasında bəzi modifikasiya dəyişiklikləri olacağını bilirsiniz. Ortaya çıxan yeni detallar isə həmin məqalədə qeyd etdiyimiz bəzi detalları demək olar ki, təsdiqləyir. Elə isə Xiaomi 12T seriyasına aid məlum olan qiymətlər və sızdırılmış ilk görüntü istinadən yeniliklərlə tanış olaq.
Xiaomi 12T Pro firmanın ilk 200MP kameralı smartfonu olsa da qiymətlər sizi sevindirməyə bilər
Üstdə gördüyünüz şəkil Phonandroid resursu tərəfindən sızdırılıb. Bu görüntüdə kamera modulu Redmi K50 Ultra ilə eyni olan smartfon görürsünüz. Lakin bir detal diqqət çəkir. Kamera modulu üzərindəki 108MP yazısı 200MP ilə əvəzlənib. Beləliklə Xiaomi 12T Pro modelinin firmanın ilk 200MP kameralı smartfonu olacağı təsdiqlənir.
Mənbənin verdiyi məlumata görə bu sensor ISOCELL HP1 200MP ola bilər. 0.64 μm piksel ölçüsünə sahib və 1/1,22 düym ilə ideal ölçüdə olan bu sensorun təəssüf ki, OIS texnologiyası ilə təmin olunmadığı deyilir. Redmi K50 Ultra modelində 108MP kamera olmasına baxmayaraq OIS stabilizatoru mövcuddur. Cihazın digər xüsusiyyətlərində isə dəyişiklik gözlənilmir. 8MP ultra-geniş bucaqlı və 2MP makro kameralar, 1.5K təsvir ölçülü yüksək keyfiyyətli ekran paneli, Snapdragon 8+ Gen 1 çipseti və.s olduğu kimi yerində qalacaq.
Xiaomi 12T Pro modelinin 8-256GB yaddaşa sahib variantı Avropada nə az, nə çox tam olaraq 849€ qiymət etiketi ilə təqdim ediləcək.
Seriyanın zəif bəndi olan Xiaomi 12T modeli də yenə Redmi K50 Ultra modelinin modifikasiya dəyişikliyi edilmiş variantı olacaq. Lakin bu modeldə hər şey sabit qalmaqla (kamerada OIS-in mövcudluğu sual altındadır) dəyişiklik yalnız çipsetin Dimensity 8100 Ultra ilə əvəzlənməsində baş verəcək. 1.5K ekran paneli, ISOCELL HM6 108MP əsaslı kamera konfiqurasiyasında və.s fərqlənmə gözlənilmir.
Xiaomi 12T modeli də qiymət cəhətdən sizləri razı salmaya bilər. Belə ki, Xiaomi 12T modelinin qiyməti 8-256GB yaddaş həcminə sahib variantı 649€ təşkil etməlidir. Nəticədə oxşar qiymətə kompakt və premium görünüşlü Xiaomi 12X modeli satılarkən, Xiaomi 12T almaq üçün əhəmiyyətli bir səbəb lazımdır. Ümid edirik ki, sızdırılmış qiymətlər reallığı əks etdirməz və cihazlar nisbətən ucuz olar. Əks halda Xiaomi 12T seriyasının satışlarına bu qiymətlər problem yarada bilər.
