Elektrikli avtomobil sənayesinin sürətli inkişafı gələcəkdə insanların işini itirməsinə səbəb ola bilər. Belə ki, avtomobil sənayəsində istifadə olunan yeni texnologiyalar səbəbindən insanlara ehtiyac qalmayacaq. Ford və Volkswagen markaları elektrikli avtomobillərin benzinlə işləyən avtomobillərə nisbətdə 30% daha az əmək tələb etdiyini hesablayıblar. Həmçinin AlixPartners konsaltinq şirkətinin hesablamalarına görə, elektrik mühərrikli avtomobillər daxili yanma mühərrikli avtomobillərlə müqayisədə 40% daha az əmək tələb edir.
Elektrikli avtomobil istehsalçıları artıq işçiləri ixtisar edir
Bir çox şirkət artıq ixtisarları hesablamağa başlayıb. Hətta məşhur Ford şirkəti 8 min işçisini ixtisar etməyi planlaşdırıb. Vaşinqton İqtisadi Siyasət İnstitutu bildirib ki, ABŞ bazarında elektromobil satışının payı 50%-ə yüksələrsə, ABŞ-da 75 min iş yeri ixtisar edilməli olacaq. Avropadakı elektrikli avtomobil istehsalçıları isə bildirir ki, avtomobil sənayesinin sürətli elektrikləşdirilməsi 2040-cı ilə qədər 275 min iş yerinin itirilməsinə gətirib çıxaracaq. Hətta bu hesablamada 2040-cı ilə qədər yaranacaq yeni iş yerləri də nəzərə alınıb.
Boston Consulting Group şirkətinin hesablamalarına görə, Avropada 2030-cu ilə qədər elektrikli avtomobillərə keçid avtomobil istehsalçıları üçün 630 min iş yerinin itirilməsi ilə nəticələnəcək. Lakin ixtisarlara baxmayaraq yeni iş yerləridə yaranacaq. Belə ki, akkumulyatorlara və enerji doldurma məntəqələrinə artan tələbat nəticəsində 580 min yeni iş yeri yaranacaq.
Hətta nəhəng elektromobil istehsalçısı olan Tesla şirkətinin rəhbəri Elon Musk iyunun 2-də bölgə rəhbərlərinə məktub göndərərək şirkətin bütün departamentlərində işə qəbulun dayandırılmasını və işçilərin təxminən 10 faizinin ixtisar edilməsini tələb edib. E.Musk bu tələbini iqtisadi vəziyyətlə əlaqələndirib. Tesla şirkətində ixtisarlar artıq ötən ayın sonundan start götürüb. İlk növbədə ixtisaslar işə yeni başlayanlara təsir etsədə yanvar ayında hətta böyük layihə menecerləri də ixtisara salınıb.
