Son 3 gündür ard-arda dayanmadan təqdim edilən smartfonlar silsiləsinin sonuna çatırıq. Hansı ki, təqdim edilən smartfonların siyahısının sonuncu pilləsində Mix Fold 2 modelindən sonra, Redmi K50 Ultra smartfonu və Xiaomi Pad 5 Pro 12.4 planşeti yer alır. Xiaomi Pad 5 Pro 12.4 bəzilərimiz üçün çox əhəmiyyətli deyil, amma məqalənin sonunda sizə planşet barədə də məlumat verəcəyik. Redmi K50 Ultra isə növbəti ay qlobal bazarda texniki cəhətdən modifikasiya dəyişikliyi edilmiş Xiaomi 12T Pro olacağından diqqətləri öz üzərinə çəkir. Əgər son anda ləğv edilməzsə, Redmi K50 Ultra ilə eyni model nömrəli cihaz hal-hazırda Xiaomi 12T Pro kimi qlobal bazar üçün hazırlıq mərhələsindədir. Xiaomi 12T Pro modelinin Redmi K50 Ultra ilə müqayisədə yarana biləcək fərqlərinə texniki xüsusiyyətlərdən bəhs edərkən toxunacağıq. İndi isə Redmi K50 Ultra modeli ilə mövzumuza başlayaq.
Brendin ən güclü cihazı hesab edilən yeni K50 Ultra modeli, dizayn cəhətdən Xiaomi 12 seriyasına sadiq qalır. Arxa tərəfin dizaynı dedikdə xüsusilə kamera modulunu nəzərdə tuturuq. Fikir verdinizsə, ən üst hissədəki kvadrat haşiyə daxilinə əsas kamera yerləşdirilib. Sol aşağı hissədə köməkçi kameralar və sağdakı LED işıq isə eyni Xiaomi 12 seriyası kimi nazik xətlər ilə bir-birindən ayrılıb. Dizaynın Xiaomi 12 seriyasına bənzəməsi vacib nüansdır. Çünki, Xiaomi 12T Pro kimi qlobal bazara çıxarılarsa, alıcının gözündə smartfonun Xiaomi 12 seriyasına bağlı olduğu hissiyatını bu xırda element çox yaxşı formalaşdırır. Ön tərəfin dizaynında isə dəyişiklik yoxdur. Yüksək keyfiyyətli və sadə (heç bir qıvrımı olmayan) ekran paneli işlədilib.
Redmi K50 Ultra modeli nə vəd edir?
Smartfonun ekranı çox güclü imkanları özündə birləşdirib. 6.67 düym AMOLED ekran paneli tam olaraq 12 bit rəng dərinliyinə sahibdir. 10 bitlik ekran panelləri 1 milyard rəng yarada bilərkən, Redmi K50 Ultra modelinin istifadə etdiyi bu ekran paneli qeydlərə görə 68.7 milyard rəng çaları yarada bilir. Təsvir ölçüsü “1220 x 2712 piksel” təşkil edir. Aralıq təsvir ölçüsü olduğundan nə FHD+, nə də QHD+ deyil. Lakin QHD+ təsvir ölçüsünə daha yaxındır və enerji sərfiyyatı QHD+ ilə müqayisədə aşağıdır. deltaE 0.38 dəyərinə rəng kalibrasiyası edilib və rəngləri lazımi dəqiqlikdə göstərə bilir. Göz üçün zərərli olan AMOLED panellərə xas titirəmə olmaması üçün 1920Hz tezlikli PWM texnologiyasını dəstəkləyir və SGS göz sağlamlığı sertifikatına sahibdir. Görüntü yeniləmə tezliyi 120Hz, sensor tezliyi 480Hz təşkil edir. Üstəlik Dolby Vision dəstəyi də olan ekran paneli, üzərinə yerləşdirilən barmaq izi sensoru ilə ürək döyüntünüzü ölçməyi bacarır.
Bizi ilk düşündürən nüans burda yaranır ki, bu cür keyfiyyətli ekran paneli “Xiaomi 12T Pro modelində də qarşımıza çıxacaqmı?”. Ümid edirik Xiaomi firması cihazı qlobal bazara gətirərkən ekranda dəyişiklik etməz.
Redmi K50 Ultra modelinin kamera modulu 3 fərqli sensorun birləşməsi hesabına yaranır. 1/1.67 düymlük 108MP ISOCELL HM6 sensoruna sahib əsas kamerası OIS stabilizatoruna malikdir. Digər 2 kamera isə 8MP 120° ultra-geniş bucaqlı, 2MP makro sensorlarından ibarətdir. Selfi kamerası 20MP IMX596 sensoruna sahibdir. Redmi K50 Ultra modeli 4K keyfiyyətdə 60FPS videolar qeydə almağı bacarır.
Xiaomi 12T Pro modeli ilə bağlı ikinci potensial dəyişiklik isə kamerada yaranacaq. Ehtimallara görə 108MP kamera sensoru 200MP təsvir ölçülü ISOCELL HP seriyası sensorla əvəzlənəcək. Əvəzləmənin qarşılığında isə OIS stabilizatorunun ləğv edilməsi gözlənilir. Ehtimalların nə qədər doğru qarşıdakı həftələrədə öyrənəcəyik.
Snapdragon 8+ Gen 1 çipseti ilə gücləndirilmiş Redmi K50 Ultra modelinə LPDDR 5 operativ yaddaş və UFS 3.1 yaddaş çipləri quraşdırılıb. 5000 mAs batareyası Surge P1 çipi ilə idarə olunur və 120 Vt sürətli şarj dəstəkləyir. Ümumilikdə 30.000 mm² ölçüsündə nəhəng soyutma sisteminə sahibdir. Ona görə də oyunlarda Snapdragon 8+ Gen 1 çipseti ilə birlikdə isinmə problemlərindən əziyyət çəkməyəcəksiniz. IP53 sertifikatına və “stereo” səs ucaldanlara sahib smartfon Android 12 üzərinə MIUI 13 ilə qutudan çıxır.
Xiaomi Pad 5 Pro 12.4 nə vəd edir?
Xiaomi Pad 6 olaraq gözlədiyimiz planşet, elə ötən il çıxarılan Xiaomi Pad 5 Pro modelinin davamı kimi yenilənmiş dizaynla qarşımıza çıxdı. Planşet də eyni Xiaomi 12 seriyasının kamera modulu dizaynını və yenilənmiş gövdə əldə edib.
12.4 düymlük IPS LCD ekran “2560×1600 piksel (2.5K)” təsvir ölçüsünə malikdir. 120Hz görüntü yeniləmə tezliyinə sahib ekranın sensor tezliyi də 120Hz təşkil edir ki, oyunlar üçün o qədər də ideal seçim olmaya bilər. Eyni zamanda ekran Xiaomi Pad 5 Pro ilə müqayisədə 10 bit yox, 8 bitə rəng dərinliyinə sahibdir. Lakin Dolby Vision və HDR10 ilə rənglərin kontrastı yüksək saxlandığından fərqi çox anlaya bilməzsiniz.
Planşetin batareyası 10000 mAs təşkil edir ki, Xiaomi Pad 5 Pro ilə müqayisədə ölçüsü kimi batareya həcmi də böyüyüb. 67 Vt sürətli doldurma ilə 1 saatdan biraz çox müddətə tam şarj olmağı bacarır. Planşet öz gücünü Snapdragon 870 çipsetindən alır. UFS 3.1 və LPDDR 5 çipləri standart olaraq quraşdırılıb. Kameralarına gəldikdə 50MP ISOCELL JN1 əsas, 2MP dərinlik sensoru ilə təchiz edilib. Selfi kamerası 20MP-dir.
Əslində, ölçüləri böyüdülmüş bu planşetin əsas məqsədi iş mühiti üçün istifadədir. DisplayPort üzərindən 3.2 Gen 1 sürəti ilə Type-C bağlantısı vasitəsilə monitor kimi işləyə bilir. Xarici bir klaviatura bağlayaraq planşeti fərqli məqsədlər üçün istifadə etmək mümkündür. Əlavə olaraq xüsusi qələm ilə planşet üzərində əllə yazılar yazmaq və qeydlər aparmaq mümkündür. Dolby Atmos dəstəkli 4 ədəd səs ucaldana sahibdir. Android 12 üzərinə MIUI 13 Pad ilə qutudan çıxır.
Xiaomi Pad 5 Pro 12.4 modelinin qiyməti
- 6-128 GB (445$)
- 8-256 GB (520$)
- 12-1 TB (620$)
Redmi K50 Ultra modelinin qiyməti
- 8-128 GB (445$)
- 8-256 GB (460$)
- 12-256 GB (505$)
- 12-512 GB (550$)
