Xiaomi firması qatlana bilən smartfon sektoruna adətən yeni nəfəs gətirdiyi Mix Fold 2 modelini anons etdi. Belə ki, smartfonu innovativ edən 2 əsas şey var. Bunlardan biri Mix Fold 2 modelinin açıq vəziyyətdə dünyadakı ən nazik smartfonlar arasında ilk beşliyə rahatlıqla daxil olmasıdır. İkincisi isə möhtəşəm ekran-gövdə nisbətinə sahib xarici ekranıdır. Smartfonun xaricindəki ekran o qədər geniş və minimum ekran çərçivələrinə malikdir ki, üstdən baxdıqda qatlana bilən cihaz təəsüratı qətiyyən yaratmır. Ötən gün Galaxy Z Fold 4 təqdimatında bəhs etdiyimiz nazik-uzun “TV pultuna” bənzətmə mövzusu Mix Fold 2 modelinin yanından belə keçə bilməz. Şirkət bunun üçün smartfonun üzərində ayrıca işləyib.
Smartfonun texniki xüsuiyyətlərinə keçmədən görünüşünü sizlərə xarakterizə edək. Arxa tərəfdə kamera modulu düzbucaqlı formada ən üst hissəyə yerləşdirilib. LEICA əməkdaşlığında hazırlanmış kamera konfiqurasiyası isə yetəri qədər güclü imkanları özündə birləşdirib. Kameralar barədə aşağıda detalları qeyd etmişik. Mix Fold 2 modelinin açılmış vəziyyətdə qalınlığı 5.4 mm, qatlanmış vəziyyətdə kamera modulu daxil qalınlığı 11.2 mm təşkil edir. Type-c girşinin 3.74 mm qalınlığa sahib olduğunu nəzərə alsaq smartfon düşündüyünüzdən çox nazikdir.
Müqayisə üçün deyə bilərik ki, Galaxy Z Fold 4 modeli qatlanmış vəziyyətdə 4.6 mm daha qalındır. Bu amillər erqonomikaya cəhətdən yaxşı görünsə də, nazik bir gövdəyə belə qatlama mexanizminin quraşdırılması xeyli çətinlik yaradıb. Nəticədə şirkət Mix Fold 2 modeli üçün ekranda daha az qırışıqlıq yaradan 18% nazik və 35% yüngülləşdirilmiş yeni konstruksiya işlədib. Karbon tərkibli elementlərlə ağırlığı azaldan Xiaomi, eyni zamanda ekranın mərkəzə doğru bükülməsinin də qarşısını xeyli alıb.
Xiaomi Mix Fold 2 bizə nə vəd edir?
İlk olaraq smartfonun xarici ekranından danışaraq mövzuya başlamaq istərdik. Çünki, Xiaomi bu cihaza ideal en-uzunluq nisbətinə sahib 6.56 düymlük Samsung E5 AMOLED ekran paneli quraşdırıb. FHD+ təsvir ölçülü 120Hz tezlikli ekran Dolby Vision dəstəyinə və bütün məlum görüntü keyfiyyəti sertifikatlarına sahibdir. Cihazın ekranı Gorilla Glass Victus ilə qorunur.
Daxili qatlanan ekran isə 8.02 düymlük LTPO2 OLED panellə təchiz edilib. 2K təsvir ölçülü ekran paneli 120Hz adaptiv görüntü yeniləmə tezliyinə sahibdir. Eyni zamanda qatlanan ekran da arxa ekran kimi Dolby Vision dəstəyinə və eyni keyfiyyət standartlarına malikdir. Diqqətinizi çəkdisə qatlanan ekran üzərində heç bir selfi kamerası quraşdırılmayıb. Xiaomi həm xərcləri azaltmaq, həm də Mix Fold 2 modelinin mühəndislik və istifadəçi təcrübəsinə çətinlik yaratmaması üçün selfi kamerasından daxili qatlanan ekranda tamamilə imtina edib. Selfi kamerası kimi onsuzda arxa kamera istifadə edildiyindən olmaması o qədər də vacib deyil.
Kamera demişkən, gəlin elə kamera xüsuiyyətlərinə nəzər salaq. Modelimizin əsas kamerası 50MP IMX766 sensoruna sahibdir və OIS ilə gücləndirilib. Digər iki kameramızdan biri isə 8MP təsvir ölçülü 2 qat optik yaxınlaşdıra bilən telefoto, digəri isə 13MP 123° ultra-geniş bucaqlı obyektivə malikdir. Smartfonun kamera texnologiyaları LEICA tərəfindən təkmilləşdirilib. Ona görə Xiaomi 12S Ultra modelindəki rəng rejimlərinin hər biri bu modeldə mövcuddur. Daxili ekranda olmasa da xarici ekranda 20MP selfi kamerası yerləşdirilib.
Smartfon öz gücünü Snapdragon 8+ Gen 1 çipsetindən alır, o cümlədən yüksək sürətli LPDDR 5 (6400Mbps) operativ yaddaş və UFS 3.1 yaddaş çipləri quraşdırılıb. Belə nazik gövdəyə 4500 mAs batareya quraşdıra bilən Xiaomi, 67 Vt sürətli şarj ilə cihazı 40 dəqiqəyə 100% doldura biləcəyimizi iddia edir. Soyutma sisteminə də diqqət edən istehsalçı 2520mm² ölçülü buxar qazanı, 9249mm² qrafit soyutma sistemi, 3715mm² bor soyutma lövhəsi istifadə edib.
Android 12 üzərinə MIUI Fold 13 interfeysi ilə təchiz edilib. Dolby Atmos və Hi-Res sertifikatlı “stereo” dəstəkli Harman Kardon imzalı səs ucaldanlara sahibdir.
Xiaomi Mix Fold 2 modelinin qiyməti:
- 12-256 GB (1335$)
- 12-512 GB (1482$)
- 12-1 TB (1779$)
