Xiaomi firması tərəfindən bu gün keçirilən tədbirdə Xiaomi 12S seriyası rəsmi olaraq təqdim edilib. Smartfon sektorunda ən azından Android ekosisteminin ən güclü kamera performansını verməyə namizəd olan Xiaomi firması 3 yeni modelini tanıdıb. Həmin modelllər Xiaomi 12S Ultra, Xiaomi 12S Pro, Xiaomi 12S modelləridir. Bu məqaləmizdə Xiaomi 12S və Xiaomi 12S Pro modelinə bir yerdə, Xiaomi 12S Ultra modelinə ayrılıqda nəzər yetirəcəyik. Xiaomi 12S Ultra tamamilə yeni və premium sinfin zirvəsində olan bir model olduğundan ayrılıqda bu model barədə bəhs etməyə ehtiyac var.
1 düymlük kamrası ilə Xiaomi 12S Ultra modeli peşəkar alıcılara xitab edir!
İlk olaraq Xiaomi 12S Ultra modelinin adında nəyə görə “S” var sualına cavab verək. Belə ki, əslində Xiaomi 12 Ultra olaraq inkişaf etdirilən bu model, son anda təkmilləşdirilmiş Xiaomi 12S seriyasına uyğunlaşdırılaraq Xiaomi 12S Ultra kimi adlandırılıb.
Smartfonun dizaynından başlasaq arxa tərəfdə bizi Xiaomi 11 Ultra modelindəki ilə bənzər böyük kamera adası qarşılayır. Kamera adası üzərində isə Xiaomi 11 Ultra modelindən fərqli olaraq heç bir köməkçi ekrana yer verilməyib. Çünki, dairəvi kamera modulunun böyüklüyü arxa tərəfdə hansısa ekran panelinin işlədilməsinə imkan vermir. Kamera modulunun sol üst hisssəsində isə LEICA imzasını görürük. Smartfonun proqram təminatından tutmuş, texniki cəhətdən obyektivin təkmilləşdirilməsinə qədər bir çox yerdə özünü göstərən LEICA firması kamera performansına ciddi təsir göstərib. Xatırladaq ki, LEICA daha əvvəl Huawei ilə işləyən brendin özüdür.
Xiaomi 12S Ultra kamerası
Smartfonda Sony tərəfindən hazırlanmış dünyanın ən böyük ölçülü kamera sensorlarından biri yerləşir. Söhbət 1 düymlük IMX989 50MP sensorundan gedir. Bu sensor ölçüsünü kobud formada elə təsəvvür ki, bəzilərinizin smartfonundakı 2 kamera sensorunu yanaşı gətirsək bəlkə ancaq bu ölçünü əldə edə bilərik. Kobud bir müqayisə də olsa sensorun böyüklüyünü bu cür təsəvvür edə bilərsiniz. 4 piksel birləşərək tək bir piksel kimi davrandıqda 12,5MP təsvir ölçülü həddindən artıq yüksək rəng dəqiqliyinə sahib görüntülər qeydə almaq mümkündür. Bu zaman bir piksel digər 3,2 µm (mikron) təşkil edir.
Belə ki, IMX 989 50MP (50,3 həqiqi) baş sensorunun obyektivi (lens) inanılmaz dərəcədə dərin detallara malikdir. Sensorun üzərində 8 elementli (8P) obyektiv paketi (lenslər) işlədilib. Həmin obyektiv parıldamamaq, rəngləri qarşıdırmamaq, sensora kölgə salmamaq üçün ciddi mühəndislik işi xərclənərək ilə hazırlanıb. Obyektivin kənarı xüsusi mürəkkəblə bağlanıb. Əlavə olaraq siklik olefin kopolimer tərkibli filter quraşdırılıb. Hətta şirkət bununla qalmayıb infraqırmızı işıqların da sensora düşməməsi üçün də obyektivdə təkmilləşdirmələr aparılıb. Sanki kimya dərsindəyik, amma Xiaomi həddindən artıq detallı iş ortaya çıxarıb. Təbii ki, LEICA ilə əmədaşlıq edildiyini də vurğulamaq lazımdır.
Bayaqdan sadəcə 1 kameradan danışmışıq. Yerdə qalan 2 ədəd kameralar isə 48MP IMX586 sensorlarına sahibdir. Onlardan biri 120mm fokus məsafəsinə sahib 5 qat optik yaxınlaşdırma edə bilən telefoto kamerasıdır. Digəri isə 128° Ultra-geniş (makro) bucaqlı kameradır.
Baş və telefoto sensorları OIS ilə gücləndirilib. Ultra-geniş bucaqlı kamera üçün belə bir dəstək mövcud deyil. Proqram təminatı cəhətdən LEICA 2 rejim təklif edir. Bunlardan biri “Leica Authentic Look”, digəri “Leica Vibrant Look” adlandırılıb. Birinci rejim yüksək işıq və kölgə kontrastına malik şəkillər yaratmağa işə yarayır. İkinci rejim isə daha çox süni intellekt dəstəkli realistik görüntülər yaratmaqda istifadə olunur.
Dəhşət verici bir şey var ki, 32MP selfi kamerası hələ də 1080P keyfiyyətdə 30FPS görüntülər qeydlər alır. Digər texniki detallara isə çox detallı girmədən Dolby Vision HDR, 10 bit DNG RAW, tipli formatlarını dəstəklədiyini deyə bilərik. Arxada iki tonlu led fləş, dToF, titrəyiş sensoru, köməkçi mikrofon da mövcuddur.
Xiaomi 12S Ultra performansı
Xiaomi 12S Ultra modelində Snapdragon 8+ Gen 1 çipseti və ayrılıqda 2 fərqli Surge P1, G1 çipləri işlədilib. Surge çipləri batareyanın idarə edilməsi üçündür. P1 çipi batareya şarj olarkən temperaturun optimal vəziyyətdə saxlanması üçün şarj dəyərlərinə nəzarət edir. G1 isə batareya istifadəsini tələbə görə optimizasiya edir. Smartfon 4860mAs batareyaya sahibdir. 67 Vt kabelli, 50 Vt kabelsiz, 10 Vt tərs şarj ola bilir. Əlavə olaraq UFS 3.1 və LPDDR 5 texnologiyasına yer verilib. Təqdimatda termal vəziyyətdən çox danışan Xiaomi firması soyutmanın əla olduğunu bildirir.
Xiaomi 12S Ultra ekranı
Smartfona 6.73 düymlük Samsung E5 AMOLED ekran paneli quraşdırılıb. 2K təsvir ölçüsünə malik ekran 120Hz AdaptiveSync Pro (1-120Hz) ekrana sahibdir. Bütün ağlınıza gələn keyfiyyət standartları mövcuddur. Bir nüansı qeyd edək ki, barmaq izi sensoru ilə ürək döyüntüsünü hesablaya bilir. Ekran bütün modellərdə Gorilla Glass Victus ilə qorunur.
Yerdə qalan detallar və qiyməti
Cihaz Dolby Atmos və Harman Kardon dəstəkli stereo səs ucaldanlarla təchiz olunub. IP68 sertifikatına sahibdir. Android 12 üzərində MIUI 13 ilə qutudan çıxacaq. Qlobal bazarda paralel təqdimatı keçirilməsinə baxmayaraq Xiaomi 12S seriyası ancaq Çində qalacaq.
Xiaomi 12S Ultra modelinin qiyməti:
- 8-256GB 5999¥ (895$)
- 12-256GB 6499¥ (969$)
- 12-512GB 6999¥ (1044$)
12S Pro və 12S modelləri sizə nə vəd edir?
Xiaomi 12S Pro və Xiaomi 12S modelləri ötən ilin sonu təqdim edilmiş Xiaomi 12 Pro və Xiaomi 12 modellərinin yenilənmiş halıdır. Bu modellərin əsas cəhəti Snapdragon 8+ Gen 1 çipsetinə yüksəltmə və kameraların LEICA ilə yaxşılaşdırılmasından ibarətdir.
Smartfonların ekranı
Xiaomi 12S Pro modelində Xiaomi 12S Ultra ilə eyni ekran paneli işlədilib. Ona görə xüsusiyyətlərini qeyd etmirik. Xiaomi 12S modeli kompakt ölçülü 6.28 düym ekrana sahibdir. FHD+ təsvir ölçülü ekranın görüntü yeniləmə tezliyi 120Hz təşkil edir. Bu cihaz da əvvəlcədən Xiaomi 12 modelində mövcud olan ekran panelinin eynisini işlədir.
Xiaomi 12S modellərinin performansı
Hər iki cihaz Snapdragon 8+ Gen 1 çipsetinə, LPDDR5 və UFS 3.1 tipli yaddaş texnologiyalarına sahibdir. Xiaomi 12S Pro ayrıca Surge P1 batareya çipi ilə də təchiz edilib. 12S Pro modelində 4600 mAs həcmli batareya işlədilib və 120 Vt sürətli doldurma dəstləkləyir. Xiaomi 12S modelində isə 67 Vt doldurma dəstəkli 4500mAh batareya quraşdırılıb. Hər ikisi 50 Vt kabelsiz, 10 Vt tərs şarj edə bilir.
Kameralar və qiymət
Hər iki cihaz LEICA tərəfindən təkmilləşdirilmiş kameralara sahibdir. Cihazların obyektivləri Leica Summicron ilə əvəzlənib. Eyni zamanda Xiaomi 12S Ultra modelində bəhs etdiyimiz proqram təminatı əsaslı xüsusiyyətlər (authentic, vibrant rejim və.s) əlavə edilib.
Xiaomi 12S seriyası modellərin hər ikisində IMX707 50MP baş sensoru işlədilib. Lakin digər kameralar modelə bağlı olaraq fərqlilik göstərir. Pro modeldə bir ədəd 50MP 2 qat optik yaxınlaşdırma edən telefoto və 50MP 115° ultra-geniş bucaqlı kameralar mövcuddur. Sadə modeldə isə telefoto yerinə 13MP ultra-geniş bucaqlı və 5MP telemakro (uzaqdan makro) sensorları vardır.
Smartfonların qiyməti isə aşağıdakı kimi təşkil edir:
Xiaomi 12S Pro
- 8-128GB 4700¥ (700$)
- 8-256GB 5000¥ (750$)
- 12-256GB 5900¥ (880$)
Xiaomi 12S
- 8-128GB 4000¥ (600$)
- 8-256GB 4300¥ (640$)
- 12-256GB 4700¥ (700$)
- 12-512GB 5200¥ (780$)
Xiaomi 12S seriyası barədə fikirlərinizi, rəylərdə bizimlə bölüşə bilərsiniz!
Xırda bir məlumat da verək ki, dekabr ayı çıxan Xiaomi 12 Pro modelinin Dimensity 9000 çipsetli yeni variantı da debüt edib. Bu smartfonda digər bir dəyişiklik isə şarj sürətinin 67 Vt-a qədər zəiflədilməsidir.
