Müxtəlif sahələrdə süni intellektdən istifadə günü-gündər artır. İndi isə Deep Longevity və Harvard tədqiqatçıları süni intellektin psixi sağlamlığa təsirini görmək üçün modellər hazırlayıblar. Bildirilib ki, hazırlanan bu modellər psixi sağlamlığı yaxşılaşdırmağa kömək edə bilər. Maraqlı tərəfi budur ki, Futurself.ai saytına daxil olaraq süni intellekt tərəfindən bizə verilən suallar əsasında xoşbəxt ola bilməyimiz üçün tövsiyələr ala bilərik. ABŞ-da aparılan tədqiqatların məlumatlarına əsaslanaraq mövzu ilə bağlı araşdırma dərc edən mütəxəssislər iki rəqəmsal insan psixologiyası modeli yaradıblar. Bu modellər hamımızı maraqlandıran bir çox məsələlərlə bağlı bizə məlumat və təkliflər verir.
Bizi ən çox maraqlandıran mövzulardan biri xoşbəxtlikdir. İnsan hər zaman bununla bağlı düşünür, kitablar yazır, xoşbəxtliyin həqiqətən var olub-olmadığını müzakirə edərək bunun fəlsəfəsini yaradır. Süni intellektin belə bir mövzu ilə bağlı inkişaf qət etməsi isə olduqca təəccüblüdür.
Elə isə iki rəqəmsal insan psixologiyası modellərinə nəzər salaq:
1)Neyron şəbəkələrdən ibarət birinci model psixoloji sorğunun məlumatlarından istifadə etməklə sorğuda iştirak edənin yaşını və 10 il içindəki psixoloji vəziyyətini təxmin edə bilir. Daha dəqiq desək, bu sistem insan şüurunun yaşlandıqca necə dəyişdiyini təsvir edə bilir. Model həmçinin fərdi inkişafa verilən önəmin yaş artdıqca azaldığını, həyatda məqsəd sahibi olmaq hissinin isə 40-50 ildən sonra itdiyini irəli sürür. Bu məlumatlar tədqiqatçılara yetkin şəxsiyyətin inkişafı ilə bağlı mövzularda kömək edə bilər.
2)İkinci model psixi sağlamlıq üçün “tövsiyə mühərriki” olaraq adlandırılır. Bu alqoritm iştirakçıları depressiyaya düşmə ehtimalına görə qruplara bölür və fərdlərin zehini cəhətdən daha yaxşı olması üçün ən qısa yolu müəyyən edir. Yəni qısacası süni intellekt fərdin daha xoşbəxt hiss etməsi üçün ən qısa yolu tapır.
Bu sistemin potensialını nümayiş etdirmək üçün Deep Longevity sözügedən psixoloji testi pulsuz yoxlamağa imkan verən onlayn xidmət olan FuturSelf-i istifadəyə verib. Buradakı nəticələr əsasında psixi sağlamlığınızı uzun müddətli yaxşılaşdırmağa kömək edəcək sənəd və süni intellekt tərəfindən hazırlanmış tövsiyələr əldə edə bilərsiniz.
Daha xoşbəxt hiss etmək üçün süni intellekt nə edir?
Buraya klik edib qeydiyyatdan keçdikdən dərhal sonra başla mənasını daşıyan “get started” düyməsinə klik edərək testdən yararlana bilərsiniz. Təqdim olunan test zamanı özünüzə inamınız, həyatdakı hədəfləriniz, emosional vəziyətiniz, ailə və ya dostlarınızla münasibətləriniz kimi bir çox məsələlərlə bağlı suallar verilir. Testin sonunda bir hesabat görəcəksiniz. Bu hesabatda süni intellekt sizə psixoloji vəziyyətiniz, sizə nələrin yaxşı gəldiyini və eyni zamanda gələcəkdəki vəziyyətinizlə bağlı təxminlər təqdim edir.
