Son vaxtlar Samsung xaric əksər flaqman smartfonlarda istifadə edilən kamera sensorlarının Sony tərəfindən təmin edildiyini yəqin ki, müşayiət etmisiniz. Təəssüf ki, bunun səbəbi ISOCELL HMX 108MP, ISOCELL GN2 50MP kimi üst seqment sensorların uğurlu davamçısının çıxarılmamasıdır. Nəticədə istehsalçıların demək olar böyük bir əksəriyyəti Sony şirkətinin IMX seriyası kamera sensorlarına keçid ediblər. Sony bu müştəriləri itirmək istəmir. Üstəlik növbəti həftədən etibarən Xiaomi 12S seriyası ilə birlikdə tam olaraq 1 düym ölçülü kamera sensorunu bazara çıxaracaq. Beləliklə dünyada sadəcə Sharp Aquos R6, Leica Leitz Phone 1 kimi barmaqla sayılan modellər 1 düymlük nəhəng kamera sensoru ilə fərqlənə bilməyəcəklər. Çünki, bir çox brend qarşıdakı aylarda IMX989 sensoru ilə 1 düym ölçülü kamera təcrübəsindən yararlanacaq.
Bəs istehsalçılar 1 düymlük IMX989 sensorundan nə dərəcədə effektiv yararlana biləcəklər?
İndiyə qədər çıxarılmış 1 düymlük kamera sensoruna sahib cihazlarda istehsalçıların diqqət etmədiyi və ya diqqət etmək istəmədiyi bir məsələ var. Sensor obyektiv daxilinə quraşdırıldıqda 1 düymlük səth sahəsindən smartfon 100% yararlana bilmir. Məsələn, sensorun sadəcə 90%-lik hissəsi görüntü yaratmaq üçün istifadə edilir. Nəticədə sensor sözdə 1 düym olsa da faktiki olaraq 1 düymlük sensor yox, ~1/1.1 düymlük sensor işətmiş olursunuz.
Bu problem ən çox elə Sony şirkətinin özünə məxsus Xperia PRO-I modeli ilə gündəmə gəlmişdi. Sony özü smartfonda sensorun səth sahəsindən tam yararlanmadıqlarını bildirir. Lakin indiyə qədər belə böyük sensorla təchiz edilmiş cihazların demək olar hər birində müəyyən qədər eyni hal aşkar edilib.
Ümid edirik ki, bu sensorun işlədildiyi ilk model olan Xiaomi 12S Ultra və davamında çıxarılacaq smartfonlar eyni problemi təkrarlanmayacaq. İstehsalçılar kamera modulunu çox böyütməmək, daha az mühəndislik işi və vəsait xərcləmək üçün bəzən belə qəribə addımlar ata bilirlər. İstifadəçi isə dərin araşdırma etmədiyi üçün sadəcə deyilən rəqəmlərə aldana bilir. Təsəvvür edin 1 düymlük sensora sahib cihaz işlədirsiniz, lakin əslində reallıq tamamilə fərqlidir.
IMX989 sensorunun digər texniki detalları isə hələlik tam dəqiq deyil. Qeyd edilənlərə görə 50MP təsvir ölçüsünə malikdir. Hər bir pikseli 1,6 mikron (μm) ölçüsündə olacaq. 4 piksel 1 piksel kimi davrandıqda gecə vaxtı inanılmaz dərəcədə keyfiyyətli şəkillər çəkə biləcək. Sensorun uzunluğu 13.052mm, eni isə 9.792mm-dir.
