Almaniya ötən həftələrdə bu qərarı qəbul etməyəcəyini bildirsə də nəticə etibarilə gözlənilənlərin heç biri baş tutmadı. Avropa rəsmi formada daxiliyanma mühərrikli avtomobillərdən imtina edir. Avropa Birliyi ölkələri 2035-ci ildən etibarən satılacaq bütün avtomobillərin emissiya miqdarının sıfır olmasını tələb edəcək. Belə ki, ümumilikdə 16 saatlıq müzakirənin nəticəsi olaraq Avropa Birliyi avtomobillərin (yük avtomobilləri və.s istisna) qalıq yanacaq ilə (benzin, dizel tipli) işləməməsinə qərar verib. Nəticədə heç hibrid avtomobillərin belə istifadəsi mümkün olmayacaq. Nəticədə avtomobillər elektriklə və ya alternativ enerjilərdən biri ilə hərəkətə gələcək.
2035-ci ilə qədər qalıq yanacaq ilə işləyən avtomobillər mərhələli şəkildə azaldılacaq
2030-cu ildən yüngül kommersiya tipli nəqliyyat vasitələrindən ayrılan CO2 miqdarı 50% miqdarında azalacaq. Ümumilikdə avtomobillərdən ayrılan emissiya miqdarında isə 55%-ə qədər azalma olmalıdır. Lakin ayrılan CO2 qazı miqdarının minimuma endirilməsində daxili yanma mühərrikləri ilə bağlı heç bir məhdudiyyətin olmaması diqqət çəkir. Çox qəribə görünsə də Avropa Birliyi böyük bir ehtimalla Almaniyanın təkidi ilə daxiliyanma mühərrikli avtomobillər üçün kiçik bir boşluq saxlayıb.
Həmin boşluq isə daxiliyanma mühərrikli avtomobillər üçün hazırlanan sintetik yanacaqlarla bağlıdır. Benzin, dizel tipli qalıq yanacaqların daxiliyanma mühərriklərində istifadəsinə icazə verilməsə də, sintetik yanacaqlar üçün heç bir məhdudiyyət tətbiq edilməyə bilər. Hazırlanan sintetik yanacaqlar isə yenə müəyyən testlərdən keçdikdən sonra müəyyən standartlara cabab vermək məcburiyyətində olacaq. Üstəlik həmin sintetik yanacaqlar daha çox lüks və ya sport avtomobillərdə şirkətlərin qorumaq istədiyi daxiliyanma mühərrikləri üçün nəzərdə tutulacaq. Ona görə də qiymətinin ucuz olması gözlənilmir.
Hal-hazırda elektromobillər və hibrid avtomobillərin satışına verilən dəstək, təşviqlər də yavaş-yavaş sonlandırılacaq. Daha aşağı vergilər, güzəştlər, bəzi yerlərdə pulsuz enerji təminatı kimi hallar 2030-cu ildən etibarən başa çatacaq. Avropa Birliyi 4 ildən sonra bu mövzunun müzakirəsi üçün təkrar görüş keçirəcək. 2026-cı ilə planlaşdırılan görüşdə gələcək illər ərzində texnologiyanın inkişaf tempinə görə yeni qərarlar verilə bilər. Yəqin ki, Almaniyanı maraqlandıran əsas məsələlərdən biri sintetik yanacaqlarla bağlı naməlum suallara elə məhz 4 il sonra dəqiq cavab tapacayıq.
