Bir elektromobili hazırlamaq üçün əsas çətinlik haradan başlayır desəniz, bəlkə də bu suala dizayndan başlayır deyə cavab versək yanılmarıq. Çünki, digər avtomobillərdən fərqli olaraq bir elektromobili dizayn edərkən aerodinamik təsirləri maksimum dərəcədə nəzərə almaq lazımdır. Aerdinamika nə qədər mükəmmlədirsə elektromobilin yürüyüş məsafəsi, effektivliyi bir o qədər yaxşı olacaq. Lakin aerdinamikadan qazanmaq çox vaxt estetik görünüşdən itirməklə nəticələnir. Bu iki bir-birinə uzaq anlayışın ortasında olan elektromobili Hyundai kimi heç bir limiti olmayan brend hazırlandıqda isə qəribə görünüşlü model ortaya çıxır. Belə ki, söhbət Hyundai IONIQ 6 modelindən gedir. Bir neçə saat əvvəl rəsmi formada anons edilən elektromobilə nəzər salaq.
“kötük” kimi Hyundai IONIQ 5 modelindən sonra sanki küləyin təsirindən arxaya doğru yastılaşacaq qədər “zərif” Hyundai IONIQ 6
IONIQ 5 və IONIQ 6 modelləri də sanki aerodinamika ilə estetik görünüşün ziddiyətinə bənzəyir. Xatırlayırsınızsa IONIQ 5 modeli çox kəskin xətləri özündə birləşdirən eksteryerə malik idi. Lakin IONIQ 6 modelinin eksteryerinə eksteryerinə baxdıqda bizi daha yumuşaq xətlər qarşılayır. Təbii ki, bunun ilk əsas səbəblərindən biri hava müqavimətini azaltmaqdır. 0,21 müqavimət əmsalı ilə Tesla Model 3 modelinə çox yaxın, hətta qeydlərə görə Tesla Model 3-ün 0,23-lük müqavimət əmsalından daha yaxşı dəyərlərə sahibdir. Lakin Tesla Model 3 qədər effektiv yürüyüş məsafəsi olub-olmayacağı dəqiq deyil.
Elektromobilin ön tərəfinə baxdıqda radiator barmaqlığı deyə bir bölmənin ümumiyyətlə olmadığı görülür. Elə Tesla Model 3 modelinə bənzər formada elektromobilin ön hissəsi önə doğru qıvrılan dizayna malikdir. Bamperdə xüsusi hava yarıqlarının olduğu hissiyatı yaransa də yaxından baxdıqda yalnız sağ və sol tərəflərdə yarıqlar olduğu görülür. O hissələr batareya paketlərini soyutmağa uyğun olmayacağı üçün əyləclərə və ya hava axınını yönləndirməyə görə açıldığını düşünə bilərik.
Avtomobilə yan tərəfdən baxdıqda güzgülərin kamera ilə əvəzləndiyi və qapı qulplarının gövdəyə inteqrasiya edildiyini görmək olur. Qapılar qabarıq bir dizayna sahib olsa da ümumilikdə digər Hyundai modelləri ilə müqayisədə nisbətən sadədir. Məsələn, yeni nəsil Elantra modelindəki kimi mürəkkəb cizgilərə sahib deyil.
Hyundai IONIQ 6 modelinin arxası isə dizayn cəhətdən ən mürəkkəb detalları özündə birləşdirib. Diffuzor avtomobilin altından arxaya doğru uzanır. Arasına isə arxa duman və geri işıqları yerləşdirilib. Bir üst mərtəbədə LED şəklində uzanmış əyləc işıqları və onun üzərində spoyler yer alıb. Həm ön, həm arxa işıqlarda “piksel” görünüşünə malik elementlər də diqqət çəkir. 20 və ya 18 düymlük diskləri aldığınız modifikasiyaya bağlı olaraq sifariş verə biləcəksiniz.
IONIQ 6 modelinin interyeri
Elektromobilin interyeri yenə sadə, bir o qədər də özünəməxsus dizayna malikdir. 12 düymlük sürücünün qarşısından mərkəzə doğru uzanan geniş bir ekran quraşdırılıb. Bütöv görünsə də ortadan 2 hissəyə ayrılıb. Hyundai, cihazlar panelinin aşağı hissəsində ənənəvi düymələri işlətməkdən imtina etməyib. Şirkət düşünür ki, boydan boya böyük ekranlar sürücü üçün o qədər də rahat deyil və alışdığımız bu tip düymələrin təkmilləşdirilərək işlədilməsi daha yaxşıdır. Ön panelin sağ və sol hissələrində yan güzgüləri əvəz edən monitorlar yerləşdirilib.
Sükan üzərində Hyundai loqotipi yerinə IONIQ brendinin fəlsəfəsinə uyğun 4 ədəd piksel quraşdırılıb. Həmin piksellər bir çox funksiyanı yerinə yetirmək üçün rəng dəyişdirə, aktiv olaraq sönüb-yana bilir. Avtomobilin interyerində təkrar emal edilmiş materiallara həddindən artıq yer verilib.
Elektromobilin digər texniki detalları
Böyük bir ehtimalla Hyundai IONIQ 5 ilə eyni batareya və elektrik mühərrikindən ibarət konfiqurasiyaya sahib olacaq. Yəni 58 kVs və 77,4 kVs olmaqla iki batareya paketi təklif ediləcək. Bu halda IONIQ 5 modeli təqribi 400-500 Km məsafə qət etdiyindən, IONIQ 6 daha yaxşı aerdinamikası ilə 500-600 Km məsafə qət edə bilər. Şirkət bu barədə dəqiq bir şey açıqlamayıb. 14 iyulda debüt etdikdən sonra texniki detallarla bağlı daha ətraflı məlumat sahibi ola biləcəyik.
