Nothing Phone (1) modeli barədə bəzilərimizi maraqlandıran əsas məsələlər yavaş-yavaş ortaya çıxmağa başlayır. Bildiyimiz kimi, Nothing brendi ilk smartfonunu 2 həftə sonra 12 iyul tarixində təqdim edəcək. Bu müddət ərzində smartfonunun dizaynı daxil olmaqla bir çox şeyi öyrənmiş olsaq da texniki xüsusiyyətləri və qiyməti barədə xəbərdar deyildik. Lakin rootmygalaxy resursu tərəfindən ötən gün smartfonla bağlı bütün əsas texniki detallar və qiyməti paylaşılıb. Belə ki, orta və ya orta-üst seqment kimi qiymətləndirə biləcəyimiz Nothing Phone (1) modelinin qiyməti texniki xüsusiyyətlərinə görə elə də ucuz olmayacaq.
Nothing Phone (1) modeli 397$ başlanğıc qiymətinə sahib olacaq
Resurs tərəfindən verilmiş məlumatların nə qədər dəqiq olduğunu bilmirik. İddia edilir ki, smartfona 6.55 düymlük OLED ekran paneli quraşdırılacaq. Ekranın görüntü yeniləmə tezliyi 120Hz təşkil edəcək. Smartfona öz gücünü orta-üst seqment cihazlar üçün xarakteristik olan Snapdragon 778G+ çipsetindən alacaq. LPDDR5 və UFS 3.1 tipli yaddaş texnologiyaları ilə təchiz ediləcək. 50MP əsas və 16MP ikinci dərəcəli kamera sensorlarının işlədildiyi qeyd edilsə də kamera parametrləri barədə ətraflı informasiya verilməyib. Selfi kamerası 16MP təşkil edəcək. 45Vt sürətlə doldurula bilən 4500mAh batareyaya malik olacaq.
Nothing brendi smartfonun qutusuna adapter qoymayacaq. Ən azından mənbə belə məlumat verir. Yeni bir modeldə şirkətin bu addımı o qədər də müsbət qarşılanmaya bilər. Qalınlığı 7,55mm, çəkisi 199 qram olan smartfon 3 fərqli yaddaş modifikasiyası ilə təklif ediləcək. Nothing Phone (1) modelinin 128GB yaddaşa və 8GB RAM-a sahib versiyası 397$ olacaq. Uyğun olaraq 256GB yaddaş və 8GB RAM-a sahib variantı 419$, 256GB yaddaş və 12GB RAM-a sahib variantı 456$ təşkil edəcək. Nothing Phone (1) modelinin qiyməti hələlik biraz baha alınıbmış kimi görünür. Smartfon təqdim edilib, satışa çıxarılmasa bu məlumatların dəqiqliyindən əmin ola bilmərik. Lakin böyük bir ehtimalla elə qeyd edilən detallar necə var qarşımıza çıxacaq. Smartfonun görüntüləri ilə daha yaxından tanış olmaq üçün aşağıdan digər məqaləmizə keçid edə bilərsiniz. Modellə bağlı olan düşünəcələrinizi isə rəylərdə bizimlə bölüşməyi unutmayın. Sizcə bu texniki xüsusiyyətlərə sahib smartfon neçəyə olmalıdır?
