Nothing Phone (1) modeli barədə yeni detallar ortaya çıxmağa davam edir. İngiltərə mərkəzli Nothing şirkətinin 12 iyul tarixində təqdim ediləcək smartfonu ilə bağlı ilk görüntülər xatırlayırsınızsa ötən həftə paylaşılmışdı. Biz də sizin üçün Nothing brendinin necə yarandığı, təsisçisi və ilk çıxaracağı smartfonla bağlı geniş bir məlumat hazırlamışdıq. Həmin günün axşamı keçirilən tədbirdə isə hər tərəfi şüşə olan qutu daxilində smartfon jurnalistlər tərəfindən canlı şəkildə ilk dəfə görüntüyə alındı. Lakin smartfonun yalnız arxa tərəfi nümayiş etdirildiyindən ekranla bağlı heç bir dizayn elementini görə bilməmişdik. İndi isə Nothing brendinə yaxınlığı ilə bilinən tanınmış Marques Brownlee tərəfindən Nothing Phone (1) canlı görüntüləri bir neçə saat əvvəl paylaşılıb. Texniki xüsusiyyətləri məlum olmasa da smartfonun bütün tərəflərdən necə göründüyü video vasitəsilə məlum olub.
Nothing Phone (1) canlı görüntülərdə simmetrik çərçivələrin varlığını təsdiqləyir
Nothing Phone (1) canlı görüntüləri ilə tanış olmağa əvvəlcə ekrandan danışmaqla başlasaq yaxşı olar. Çünki, arxa tərəfin dizaynı bizə ötən həftədən məlumdur. Belə ki, smartfonun gövdəsi iPhone 12 modeli ilə bənzər quruluşa malik olduğundan ön tərəfdən baxdığınız zaman sanki çərtiksiz iPhone görəcəksiniz. Ekranın kənar çərçivələri gözümüzə cüzi qalın görünür. Lakin hər tərəfdən eyni qalınlıqdadır. Yəni çənə qismi deyə adlandırdığımız bir şey yoxdur. Selfi kamerası sol üst hissəyə alınıb. Bəyənib-bəyənməmək zövq məsələsidir, amma sol üstə yerləşdirilmiş kamera üst və sol kənardan bərabər məsafədə deyil deyə gözünüzə o qədər də xoş gəlməyə bilər. Selfi kamerasının sol üstdə olması bəlkə də, köhnə OnePlus həmtəsisçisi Carl Pei-ın işidir.
Smartfonun arxa tərəfində isə bizi bildiyimiz dizayn elementləri gözləyir. Arxasındakı böyük ledlər zəng zamanı xüsusi işıq effektləri yaradacaq. Əlavə olaraq bildiriş işığı xüsusiyyəti, batareyanın doluluq vəziyyəti tipli informasiyalar da həmin led işıqlar vasitəsilə veriləcək.
Kamera ilə sağ paralelə yerləşdirilmiş kiçik bir qırmızı işıq da görmək mümkündür. Həmin işığın hələlik yalnız video çəkilişi edərkən aktivləşdiyi məlumdur. Başqa haralarda tətbiq olunacağı bilinmir.
Smartfonun arxa tərəfi eyni zamanda naqilsiz enerji yığmaq və ötürmək üçün işlədilir. Qiyməti, texniki xüsusiyyətləri barədə qeyd etdiyimiz kimi, heç bir məlumat mövcud deyil. Sızdırılmış məlumatların doğruluq payından əmin deyilik. Sadəcə deyə bilərik ki, deyəsən smartfon orta seqment üçün nəzərdə tutulub. Nothing Phone (1) modelinin 100 ədəd xüsusi buraxılışı isə bu gündən StockX platforması üzərində hərraca çıxarılıb.
Marques Brownlee tərəfindən paylaşılmış video ilə aşağıdan tanış ola bilərsiniz:
