Avropa Birliyinin gələcək 10 illik üçün ekoloji problemləri azaltma planının ən böyük hissəsi daxiliyanma mühərrikli avtomobillərin qadağan edilməsidir. Cümlə şəklində baxdıqda bu planın həyata keçirilməsi asan görünür. Lakin praktikada milyonlarla belə avtomobildən 15 il kimi qısa vaxt ərzində necə tamamilə imtina ediləcək həqiqətən maraqlı məsələdir. İlk növbədə istehsalçıların daxiliyanma mühərrikli avtomobillərin istehsalını azaltması bu prosesə təkan verəcək. Həmin bölgələrdə yaşayan insanlar elektromobillərə üstünlük verdikcə iş biraz da rahatlaşdıracaq. Amma yenə də problemi həll edəcək qədər yetərli görünmür. Çünki indiyə qədər istehsalatdan çıxmış avtomobillər böyük bir əksəriyyət tərəfindən istifadə olunur. Elektromobillər bəzilərinin büdcəsinə, bəzilərinin məqsədinə, bəzilərinin zövqünə xitab etmir. Digər bir tərəfdən ötən gün verilən açıqlamada Almaniya da daxiliyanma mühərrikli avtomobilləri ləğv etmə qərarına qarşı çıxıb. Almaniya, Avropa birliyiylə daxiliyanma mühərrikli avtomobillərin ləğv edilməsi cəhətdən razılaşmır.
Almaniya daxiliyanma mühərrikli avtomobillərin bazarda müəyyən bir paya sahib olmasını istəyir
Avropanın ən böyük avtomobil istehsalçılarına sahiblik edən Almaniya daxiliyanma mühərrikli avtomobillərin ləğv edilməsini tələb edən qərarı qəbul etmək istəmir. Almaniyanın Maliyyə naziri Christian Lindner BDI Sənaye Assosiasiyası tərəfindən keçirilən tədbirdə bu barədə məlumat verib. Christian Lindner qeyd edir ki, Avropa Birliyində olan ölkələrin 2035-ci ildən benzin və ya dizellə işləyən avtomobillərin istehsalını, satışını qadağan edən qərar qəbul etməsi doğru deyil. Onun sözlərinə görə daxiliyanma mühərrikli avtomobillər nə olarsa olsun müəyyən qədər bazar payına sahib olmalıdır. Almaniya, bu planın yanlış olduğunu düşündüyü üçün Avropa Birliyiylə daxiliyanma mühərrikli avtomobillərin qadağan edilməsi qərarında razılaşmır.
Lakin bu o demək deyil ki, Almaniya elektromobilləri dəstəkləmək istəmir. Christian Lindner, Almaniyanın bu qərarla razılaşmamasına baxmayaraq elektromobil sektorunda lider ölkələrdən biri olmaq üçün çalışdıqlarını vurğulayıb.
Bir neçə həftə əvvəl Avropa Parlamentində keçirilmiş ilkin səsvermədə təklifin həyata keçirilməsi səs çoxluğu ilə qəbul edilib. Təklifin qanuni olması üçün ikinci mərhələdə Avropa Birliyinə üzv dövlətlərin razılığı əldə olunmalıdır. Buna görə də elə Almaniya timsalında razılaşdırıla bilməyən bu qərarda müəyyən dəyişikliklərin edilməsi, ya da təxirə salınması lazımdır.
