Yaddaş kartları hal-hazırda smartfonlarda sadə istifadəçilər üçün əvvəlki qədər əhəmiyyətli deyil. Yeni istehsal olunmuş cihazların əksəriyyətinin minimum 64GB yaddaş tutumuna malik olması, alıcıların minimum 128GB yaddaşa sahib smartfonlardan yana seçim etməsi kimi hallar bazarda mikro yaddaş kartlarına olan tələbatı xeyli azaldıb. Heç smartfonların bəzisində yaddaş kartına yuva belə mövcud deyil. İndi insanlar daha çox peşəkar məqsədlər üçün yaddaş kartlarından istifadə etməyə maraqlıdırlar. Əsasən də yüksək keyfiyyətdə video qeydlərin edilməsi zamanı yaddaş kartları tez-tez mütləq şəkildə lazım olur. Qeydə alınan videolar bəzən o qədər yer tutur ki, bir yaddaş kartı ilə hər hansı bir işi axıra qədər tamamlamaq olmur. Micron şirkəti isə məhz bu tip peşəkar işlərdə ehtiyacınızı tam olaraq ödəyə biləcək dünyanın ilk 1.5TB yaddaş kartını təqdim edib.
Micron i400 adı verilən 1.5TB yaddaş kartı güclü texniki detallara sahibdir
ABŞ mərkəzli 43 illik təcrübəyə sahib Micron Technology şirkəti ötən gün dünyanın ilk 1.5TB-lıq yaddaş kartını anons edib. Şirkət bu yaddaş kartına maraqlı bir zəmanət verərək 5 il boyunca 7/24 saat işləyə biləcəyini bildirir. Xüsusilə təhlükəsizlik kamerası sistemlərində (CCTV) işlətmək üçün hazırlanmış bu yaddaş kartı 1.5TB yaddaş tutumu sayəsində 4 ay ərzində video qeydlərin axsamadan qeydə alınmasında istifadə edilə biləcək. Davamlı olaraq hər hansı bir serverə məlumat ötürülməsi ehtiyacını aradan qaldıracaq.
i400 modelinin istehsal prosesi 176 qatlı 3D NAND texnologiyalı yaddaş çiplərinə əsaslanır. Yaddaş kartı kənar tətbiqlərin yaddaş kartının topladığı datalar üzərində real zamanlı süni intellekt analizi etməyinə imkan verir. Məsələn, ağıllı kameraların və digər cihazların qoşulduğu sistemlərdə məlumat fərqli bir mənbəyə ötürülməyəcək. Əməliyyat birbaşa yaddaş kartı üzərində icra ediləcək. Səkkiz ədədə qədər süni intellekt sisteminin eyn vaxtda 4K videoları yaddaş üzərindən işləməsi də mümkündür ki, obyektlərin aşkarlanması, üzlərin skan olunması tipli proseslər üçün dataya birbaşa müdaxilə imkanı təmin edir.
Mənfi 25 dərəcədən, müsbət 85 dərəcəyə qədər temperaturlarda işini davam etdirəcək. Uzun sözün qısası Micron şirkəti bu yaddaş kartını sırf peşəkar məqsədlərə görə hazırlayıb. Yəqin ki, hamıya bu yaddaş kartının qiyməti maraqlıdır, amma hələlik Micron tərəfindən rəsmi qiymət açıqlanmayıb.
