Smartfon bazarında 10 ilə yaxındır fəaliyyət göstərən OnePlus brendini çoxlarımız tanıyırıq. OnePlus brendi 2013-cü ilin dekabr ayında Pete Lau tərəfindən, Carl Pei ilə birlikdə yaradılmışdı. Pete Lau-nun rəhbərliyi altında çıxmış ilk OnePlus smartfonu olan OnePlus One 2014-cü ildə təqdim edildi. Şirkətin hədəfində 50.000 smartfon satmaq var idi. Lakin cihaz o qədər uğurlu idi ki, tam olaraq 1 milyon ədəd satmağı bacardı. 2020-ci ildə isə çoxlarımızı təəssüfləndirən və bir növ OnePlus brendinin “ölümü” kimi qiymətləndirilən hadisə baş verdi. Carl Pei, həmtəsisçisi olduğu OnePlus-dan ayrıldığını açıqladı. Yəni OnePlus 7 seriyası və üzərinə bəzi təkmilləşdirmələr edilərək çıxarılmış OnePlus 8 seriyası Carl Pei dövründə çıxarılmış son cihazlar oldu. Davamında OnePlus brendi tamamilə OPPO şirkətinə inteqrasiya edildi. OnePlus brendinin son zamanlar təqdim etdiyi smartfonlar isə göz qabağındadır. Amma heyfislənməyə dəyməz, çünki Nothing Phone (1) smartfonu artıq çox uzaqda deyil.
Carl Pei, OnePlus brendindən ayrılıb tamamilə özünə aid Nothing brendini təsis etdi
Carl Pei hər şeyi əvvəlcədən planlaşdırmışdı. OnePlus brendindən ayrıldığı andan etibarən Nothing şirkətini yaratdı. Qısa bir müddət ərzində Reddit baş icraçı direktoru Steve Huffman, Twitch həmtəsisçisi Kevin Lin, tanınmış şəxsiyyətlərdən Casey Owen, Tony Fadell tərəfindən 7 milyon dollara qədər yatırım aldı. Şirkət inanılmaz sürətlə rəğbət toplayaraq 2021-ci ilin 27 yanvarında, şirkətin anons edildiyi tarixdən sadəcə 5 ay sonra ilk məhsulu olan Nothing Ear (1) qulaqlığını 100$ qiymət etiketi ilə satışa çıxartdı.
Nothing Ear (1) şirkətin “heçlik” konseptinin fəlsəfəsini bizə göstərdi. Məhsul da istifadəçilər tərəfindən xeyli sevildi və şirkət daha da sürətli böyüməyə davam etdi. 13 oktyabr 2021 tarixində şirkət dəyəri 50 milyon dollara yüksəldi. Qualcomm, Nothing ilə əməkdaşlığa başladı. 23 mart 2022-ci ildə Nothing Phone (1) modelinin çıxarılacağı rəsmi şəkildə bəyan edildi.
Qarşınızda, Nothing Phone (1).
2022-ci ilə damğasını vurmaq istəyən smartfon!
Nothing Phone (1) modeli barədə ortaya çıxan yeni detallar
12 iyul tarixində təqdim ediləcək Nothing Phone (1) modelinin necə görünəcəyi nəhayət bu gün paylaşılan posterlərlə məlum oldu. iPhone modelləri kimi kəskin kənarlara sahib smartfon alüminium çərçivələrə malikdir. Arxa tərəfin özünəməxsus dizaynı şirkətin konseptinə uyğun şəkildə hazırlanıb. Bu dizaynı tam olaraq şəffaf adlandıra bilmərik, lakin diqqətləri öz üzərinə toplayacağı dəqiqdir.
Nothing brendi arxa tərəfdə çox sayda kamera olmasının tərəfdarı deyil. 2 kamera sensoru mövcuddur və dəqiqdir ki, bu kameralar makro və ya dərinlik sensoru funksiyasını yerinə yetirmirlər. Şirkətin Sony, Samsung, Visionox tərəfindən müəyyən komponentləri təmin etdiyini nəzərə alsaq 2 ədəd naməlum sensor IMX və ya ISOCELL seriyasından ola bilər.
Smartfonun texniki xüsusiyyətlərinə dair çox az şey dəqiq bilinir. Ehtimal edilən xüsusiyyətlərdən aşağıda bəhs etmişik, lakin Nothing Phone (1) modeli Carl Pei-in əlində soldakı şəkildə kompakt ölçülü smartfona bənzəyir.
Nothing Phone (1) modelinin arxasında kameranı haşiyəyə alan hissədə, naqilsiz enerji doldurmanın mövcud olduğu hissədə, eyni zamanda alt və sağ yuxarı hissələrdə smartfonun geniş səthini əhatə edən bildiriş işığı mövcud ola bilər. Ötən gün paylaşılmış videoda həmin hissələrin parladığı hiss olunur.
iddialara görə smartfon 6.55 düym OLED ekrana sahib olacaq. Ekranın kənar çərçivələri tamamilə simmetrikdir, çənə hissəsi deyə bir şey yoxdur. Ümid edirik yanlış olar, amma mənbələr cihazın Snapdragon 7 Gen 1 çipseti ilə təchiz edildiyini bildirirlər. 4500mAh batareyası 45W sürətli doldurma dəstəkləyəcək. 3 il Android, 4 il təhlükəsizlik yeniləmələri ilə təmin ediləcək. Nothing OS interfeysli əməliyyat sistemi ilə qutudan çıxacaq. Qiyməti və texniki xüsusiyyətləri barədə daha dəqiq məlumat almaq üçün 12 iyula qədər gözləməli olacağıq.
