Bu gün Mars quru, dondurucu soyuq və ölümcül radiasiyaya boğulmuş olsa da, yeni sübutlar Qırmızı Planetin nə vaxtsa geniş okean ilə əhatə olunduğunu ortaya çıxarır. Belə ki, Çinin Zhurong roverindən əldə edilən məlumatlar şimal Marsın düzənliklərində basdırılmış sahil xətləri haqqında mühüm məlumatı ortaya çıxarır.
Proceedings of the National Academy of Sciences jurnalında dərc edilən araşdırmaya görə, elm adamları Marsda dayaz suların və sahillərin vaxtilə mövcud olduğunu göstərən çöküntü strukturlarını aşkar etmək üçün Zhurongun yeraltı radar şəkillərini təhlil ediblər. Məlumatlara görə, alimlər yeraltı materialların maili və alçaq ərazilərə doğru yönəldiyini müəyyən ediblər. Bu cür birləşmələr Yerdəki qədim sahil xətlərinə bənzər xüsusiyyətlərə malikdir. Araşdırmanın həmmüəllifi, Penn State Universitetindən Dr Benjamin Cardenas bildirir ki, “Adətən, radar çöküntülərin ölçüsündə hətta incə dəyişiklikləri aşkar edir, yəqin ki, burada baş verənlər də belədir”.
Ümumiyyətlə, illərdir ki, elm dünyası Mars planetində bir vaxtlar okean və ya okeanlar olub olmaması ilə bağlı böyük mübahisələr aparır. Xatırladaq ki, Planetdə daha əvvəl çayların və göllərin mövcudluğuna dair güclü dəlillər tapılmışdı. Hətta bu gün Marsın səthinin dərinliklərində maye suyun ola biləcəyi düşünülür. Bildirilir ki, yeni kəşf Marsın keçmişində həyatın olma ehtimalını gücləndirir. Məhz bütün bu sübutlar bir daha Marsda insanlar üçün yeni həyatın qurula bilinəcəyinə işarə edir.
