Robotexnikanın hər keçən gün inkişaf etdiyi müasir dövrdə bir çox texnologiya kəşf olunub istifadəyə verilsə də, istifadəyə verilə bilməyən texnologiyalar da mövcuddur. Belə ki, Cənubi Koreyalı mütəxəssislər virtual aləm üçün toxunma hissini ötürə bilən kompakt cihaz və ya texnologiya hazırlayıb. İndiyə qədər virtual aləmdə bir çox real hissləri yaşada bilən cihaz təqdim olunmuşdu. Belə ki, bu cihazlara virtual aləmdə qoxunu hiss etməyə imkan verən və ya sizi öldürə bilən cihazlar aiddir. Ümumiyyətlə əvvəllər insanlara toxunma hisslərini ötürməyə imkan verən eksperimental “telehaptik” sistemlər mövcud olsa da, bunlar olduqca ağır və istifadəyə yararsız idi. İndi isə Cənubi Koreyalı mütəxəssislər pyezoelektrik materialdan hazırlanan yeni yüngül və istifadəyə yararlı cihaz hazırlayıblar.
Virtual aləm üçün toxunma hissini ötürə bilən yeni cihaz necə işləyir?
Cənubi Koreyanın Elektronika və Telekommunikasiya Tədqiqat İnstitutunun mütəxəssisləri tərəfindən hazırlanan cihaz, insan əlinə taxılaraq istifadə olunur. Belə ki, cihaz 2 istifadəçi tərəfindən taxılır. Bundan sonra isə bir cihaz emosiyaları digərinə ötürür və 2-ci cihaz da həmin emosiyaları qəbul edir. İstifadəçinin əlinin arxa tərəfində cihazın kiçik elektron paneli yerləşir. Həmin panel isə şəhadət barmağına yapışdırılmış qalınlığı 1mm-dən az olan pyezoelektron elementə birləşir.
Cihazın əsas prinsipi isə pyezoelektrik materialın vibrasiya və mexaniki təsirə məruz qaldıqda elektrik cərəyanı yaratması ilə bağlıdır. Beləliklə istifadəçi barmağı ilə hər hansı cismə toxunduqda elektrik cərəyanı yaradılaraq, digər istifadəçiyə ötürülür. Qeyd edək ki, sınaq zamanı cihaz 97% uğurlu nəticə göstərib. Gələcəkdə isə alimlər cihazı daha da təkmilləşdirməyi planlaşdırırlar. Belə ki, onlar isti və soyuq səthlərə toxunarkən yaranan hissi də cihaz vasitəsi ilə virtual olaraq ötürmək istəyirlər.
