Yəqin ki, siz bir çox elmi-fantastik filmlərdə personajların virtual reallıqda öldükdən sonra real dünyada da öldüyünü görmüsünüz. Belə ki, bu filmlərdə personajlar virtual reallıq dünyasında savaşır və məğlub olduqda real dünyada ölürdülər. Oculus şirkətinin qurucusu Palmer Luckey filmlərdə gördüyümüz hadisəni reallaşdıran VR cihazı yaradıb. Belə ki, Luckey öz blogunda bu barədə məlumat verib və hazırladığı cihazın yalnız dekor məqsədilə istifadə etdiyini qeyd edib.
Ölümcül VR cihazı necə işləyir?
Xatırladaq ki, 2014-cü ildə Oculus brendi Facebook yəni hazırki Meta şirkəti tərəfindən 3 milyard dollara alınmışdı. Palmer Luckey isə Oculus brendinin həmtəsisçisidir. Luckey bazar günü şəxsi istifadə üçün hazırladığını iddia etdiyi ölümcül VR cihazı barədə məlumat verib. Onun sözlərinə görə bu cihaz 3 partlayıcı modulu ilə təchiz olunub. Bu modulları cihazın ekranının izləyə bilən fotosensor ilə birləşdirib. Beləliklə bu fotosensorlar cihazın ekranında istifadəçinin virtual reallıqda öldüyünü gördükdə partlayıcıları aktivləşdirərək istifadəçini real dünyada öldürür.
Palmer Luckey öz blogunda bu cihazı hazırlayarkən, nerdy anime seriyasının komiksi olan Sword Art Online komiksindən ilhamlandığını qeyd edib. Belə ki, bu komiksdə personajlar Luckey-in hazırladığı VR cihazına bənzər NerveGear adlanan cihazı geyinirdilər. Bu cihazı geyinən personajlar daha sonra ölüm oyununda həyatda qalmağa çalışırdılar. Luckey bildirib ki, real həyatı virtual həyata inteqrasiya etmək fikri hər zaman onun məqsədi olub.
Palmer Luckey hazırladığı ölümcül VR cihazı ilə bağlı hələ bir neçə ideyasının olduğunu vurğulayıb. O istifadəçilərin oyun bitənədək cihazı başlarından çıxarmasının qarşısını almaq istəyir. Bu cihaz nə qədər qorxuducu olsa da narahat olmaq üçün heç bir səbəb yoxur. Çünki bu cihaz satışda deyil, Luckey bu cihazı sadəcə ofisdə və ya evdə dekor olaraq istifadə etmək məqsədi ilə hazırlayıb. Həmçinin Luckey qeyd edib ki, o cihazı sınaqdan keçirmək üçün kifayət qədər cəsarət toplaya bilməyib.
