Müasir dövrdə həyatımızın bir parçasına çevrilən cihazlar üçün kompüter kodlarının yazılması müəyyən bilik və bacarıq tələb edir. Bir robotu idarə etmək üçün kod yazılması isə daha mürəkkəb prosesdir və lazımi proqramlaşdırma biliyi olmadan ən sadə proqramlaşdırma kodlarının yazılması qeyri-mümkündür. Məhz bu səbəbdən Google şirkəti insan nitqini anlayaraq özü-özünə proqramlaşdırma kodu yaza bilən bir robot yaradıb.
Google bu robotu Code as Policies və ya CaP adlandırıb. Belə ki, şirkət robotun süni intellekt alqoritmini Pathways Language Model yəni PaLM əsasında hazırlayıb. Robot sahib olduğu alqoritm vasitəsilə səsli şəkildə verilən əmrləri icra etmək üçün ilk öncə özünü kodlayır sonra isə əmri yerinə yetirməyə başlayır. Google tədqiqatçıları sistemə təlimat nümunələrini və bu təlimata uyğun olaraq kod hazırlamağı öyrədiblər. Həmçinin şirkət iddia edir ki, robot qarşılaşdığı yeni təlimatları və yeni əmrləri sintez edib kodlaşdıra biləcək. Kodlaşdırdığı təlimatları isə yadda saxlaya biləcək.
Lazım gəldikdə isə CaP robotu hesab apara, həmçinin Python üçün “if/else” və “for/while” döngüsünə əsaslanan kodları yaza bilir. Hətta yeni robot əlavə funksionallığı həyata keçirmək üçün kitabxanaya üzərindən lazımi dataları əldə edir. Robot müəyyən alqoritm ilə işlədiyi üçün bəzən mürəkkəb hərəkət ardıcıllıqlarını yerinə yetirə bilmir və ya verilən əmrləri anlaya bilmir. Bütün bunlara baxmayaraq deyə bilərik ki, şirkətin hazırladığı yeni robot, texnologiyada ciddi irəliləyiş əldə edib. Google yeni robotun alqoritmində müəyyən təkmilləşdirmələr etdikdən sonra bu robot gələcəkdə müxtəlif sahələrdə istifadə oluna bilər.
