Hər hansı startap və ya məhsul üzərində işləyirsinizsə uğurlu davam etmək və müştəri seqmenti toplamaq üçün diqqət etməli olduğunuz nöqtələr olduqca çoxdur. Bu yazımızda həm startaplar üçün reklam manipulyasiyasının nəyə görə vacib olduğundan və bir başqa önəmli məsələ olan “PR” mövzusunu ələ almaq istədik.
Startaplar üçün məhsullarını böyük kütləyə tanıtmağın ən yaxşı yolu uğurlu reklam strategiyası hazırlamaqdır. Lakin hazırlanacaq reklam effektiv təsirə malik olmalıdır ki, bunun üçün çəkdiyiniz xərclər öz qarşılığını ödəyə bilsin. Nəticədə reklamınızın uğuru birbaşa olaraq məhsulunuzun manipulyasiya edici formada qarşı tərəfə aşılanması ilə əlaqəlidir. Məsələn, aparılan araşdırmalara görə hal-hazırda nəhəng şirkətlər görüntüdən əlavə, musiqilərin reklamlardakı manipulyasiya edici təsirindən istifadə edirlər. İnsanlarda emosiyaların yaranmasında daha effektiv təsirə malik olan musiqilər reklamda məhsula olan heyrətləndirici duyğunun artmasına səbəb olur. Startaplar üçün reklam manipulyasiyasının nə qədər vacib olduğunu Apple, Riot və s. kimi tanınmış texnoloji şirkətlərin nümunələrindən görə bilərik. Belə ki, adını çəkdiyimiz bu brendlər məhsulunun satılmasına yüksək keyfiyyətli təşviq edici hissiyat yaradan brendlərdir.
Reklam manipulyasiyası ilə “PR” birləşdikdə mükəmməl nəticələr ortaya çıxır
Çox təəssüf ki, bu gün yeni başlamış startaplar və ya yeni layihələr ölkəmizdə “PR” anlayışına çox zəif yanaşırlar. Həqiqətdə isə startaplar üçün reklam manipulyasiyası qədər “PR” anlayışı da xüsusi önəm daşıyır. Xırda bir araşdırma etdikdə, əksər layihələrin ictimailəşdirilməsi üçün həmin işlə bağlı yetəri qədər material resursunun mövcud olmadığı görülür. Reytinqli startaplar belə düzgün “PR” planlaması etmədiyi üçün lazımi kütləyə çatmaqda çətinliklər yaşayırlar. Həmin kütlə isə bəlkə də potensial investorları özündə birləşdirir. Məsələn, xarici nümunələrə baxarkən məhsulunu təqdim etməmiş bir şirkətin məhsulu barədə insanları təəccübləndirəcək görüntü və videoları dərc etməsi hesabına milyonlarla dollar investisiya və potensial müştəri topladığı ilə qarşılaşa bilərsiniz. Buna isə texnologiya dünyasında tanınmış yeni nümunələr kimi Humane, Nothing kimi brendlər ola bilər. Bəli, əslində bu brendlərin arxasındakı şəxsiyyətlər də brendin dəyərinə dəyər qatmaqdadırlar. Lakin şəxsiyyət faktoruna yox, məhsula fokuslanan minlərlə insan sadəcə məhsula güvən qazanacağı bir təqdimatla, məhsulu görmədən potensial olaraq böyük yatırımlar edə bilər. Nəticədə düzgün planlaşdırılmış “PR” üçün çəkilən xərclərdən çəkinməmək, daha çox gəlir qazanmağa imkan yaratmaqdadır. Təsisçilərə isə, ən azından təməl media resurslarını bacardıqca təkmilləşdirməyi məsləhət görürük.
Daha əvvəlki xəbərlərimizdən birində keçdiyimiz ildə iflas edən startaplar və onların bazarda qarşılaşdığı vəziyyətlərlə bağlı xəbəri də buradan oxuya bilərsiniz.
Startap ekosistemi xəbərlərini "İnformasiya və Rəqəmsal İnkişaf Agentliyi" ilə tərəfdaşlığımız çərçivəsində oxuyursunuz.
