Alimlər gün keçdikcə bitexnologiyalar sahəsində yeni texnologiyalar və yeni üsullar kəşf edirlər. Bu yaxınlarda isə Ostindəki Texas Universitetinin alimləri insanların fikirlərini uzaqdan oxumaq üçün yeni üsul kəşf ediblər. Keçmişdə zehni oxuma üsulları elektrodların insanların beyninin dərinliklərinə yerləşdirilməsinə əsaslanırdı. 29 sentybrda BioRxiv verilənlər bazasında dərc olunmuş hesabatda təsvir edilən yeni üsul, elektrodların insan beyninə yerləşdirilməsi əvəzinə funksional maqnit rezonans görüntüləmə (fMRI) adlı beyin skan etmə texnologiyasına əsaslanır.
Əsas ideya ondan ibarətdir ki, fMRI yəni funksional rezonans görüntüləmə beyində oksigenlə zəngin qan axınına nəzarət edir. Bu zaman beyində işləyən neyronların daha çox enerji və oksigenə ehtiyacı olduğu üçün bu məlumat beyin fəaliyyətinin dolayı ölçüsünü təmin edir. Bu üsul real vaxtda beyin fəaliyyətini ölçmək üçün uyğun deyil, çünki beyin hüceyrələrinin yaydığı elektrik siqnalları qanın beyindən keçməsindən daha sürətli hərəkət edir. Lakin alimlərin iddiasına görə, insanların fikirlərini uzaqdan oxumaq üçün bu üsuldan istifadə etmək mümkün olur.
Alimlər 20 və 30 yaşlarında olan bir qadın və iki kişinin beynini skan edib. Hər bir iştirakçı brauzerdə bir neçə seans ərzində ümumilikdə 16 saat müxtəlif podkastlara və radio şoularına qulaq asıb. Alimlər daha sonra bu skanları “dekoder” adlandırdıqları kompüter alqoritminə köçürüb. Bu insanların beyin fəaliyyətlərinin nəticəsini qulaq asdıqları podkast və şou ilə müqayisə ediblər. Nəticədə alqoritmin qeydə aldığı məlumatlar, insanların qulaq asdığı podkast və radio şouların mövzusu ilə uyğunlaşıb. Gələcəkdə alimlər danışa və yaza bilməyən insanlar üçün nəzərdə tutulmuş beyin-kompüter interfeyslərində istifadə üçün bu texnologiyanı inkişaf etdirməyi planlaşdırır.
