Google Play Store mağazasında bəzi proqramların istifadəçilər üçün yeni risklər yaratdığı aşkar edilib. Quraşdırıldıqda, adətən günahsız görünən bu proqramlar telefonunuzu Sharkbot adlı trojan yoluxdurur və bank məlumatlarınızı oğurlaya bilir. Amsterdamın Threat Fabric şirkəti yeni bloq yazısında Android istifadəçilərinin giriş məlumatlarını, hesab nömrələrini və digər maliyyə məlumatlarını oğurlamaq üçün hazırlanmış yeni bank Trojanı barədə xəbərdarlıq edir.
Sharkbot adlı trojana sahib bank məlumatlarını hədəf alan zərərli proqramlar hesab nömrənizi və digər həssas maliyyə məlumatlarınızı əldə edə bilər. Google Play Store-da mövcud olan bu proqramlar əvvəlcə normal, zərərsiz proqram kimi çıxış edir. Bundan sonra bu proqram sizə “yeniləmə” sorğusu göndərir və saxta Play Store mağazasına yönləndirir. Brauzerdə açılan bu səhifə şişirdilmiş proqram məlumatları ilə istifadəçiyə təhlükəsiz hiss etdirməyə çalışır. Bu səhifəyə daxil olduğunuz zaman isə yükləmə prosesi avtomatik olaraq başlayır və beləliklə, trojan tək bir linkə getməklə yüklənmiş olur.
Amsterdamda mərkəzli ThreatFabric şirkəti tərəfindən zərərli proqram təminatının tətbiq mağazalarından silinməsi üçün lazımi tədbirlər görüldüyü bildirsə də, tətbiqin mağazadan silinməsi onun telefonunuzdan silinməsi demək deyil. Buna görə də, aşağıdakı proqramlar cihazınızda mövcuddursa, həmin tətbiqləri smartfonunuzdan silməyi unutmayın.
- Recover Audio, Images & Videos– 100.000 yükləmə
- Codice Fiscale 2022– 10.000 yükləmə
- Zetter Authentication– 10.000 yükləmə
- File Manager Small, Lite– 1000 yükləmə
- My Finances Tracker – 1000 yükləmə
