Google, Android 10-dan etibarən zənglərin qeydə alınmasını əməliyyat sistemindən ləğv etmişdi. Lakin buna baxmayaraq bir çox istifadəçi Google Play Store üzərindəki tətbiqlər vasitəsilə zəngləri qeydə ala bilirdilər. İndi isə şirkət 11 Maydan etibarən 3.tərəf tətbiqlərin zəngləri qeydə almaq üçün istifadə etdiyi API-ləri qadağan edən yeni siyasətini yayımlayacaq.
Google Play Store üçün yenilənmə gəlir
Androud Authority tərəfindən verilən məlumatlara görə Google şirkəti yavaş-yavaş müxtəlif Android versiyalarından zəngləri qeydə almağa imkan verən API-ləri bloklayır. Şirkət bunu istifadəçi məlumatlarını qorumaq və təhlükəsizliyi təmin etmək üçün etdiyini bildirib. Bundan başqa zəng qeydlərinin müxtəlif ölkələrdə qanunla qadağan olması da bu addımın başlıca səbəblərindən biridir. Lakin burada maraqlı bir məqam var. Beləki, şirkətin yeni siyasəti sadəcə Google Play Store-da olan zəng qeydə alan tətbiqlərə aiddir. Xiaomi, Huawei kimi şirkətlərin smartfonlarında zəngləri qeydə almaq mümkündürsə yeni qadağalar buna təsir etməyəcək. Burada bütün məsuliyyət smartfon istehsalçılarına aid olacaq. Əlavə olaraq öncədən yüklənmiş tətbiqlər də yeni qadağalardan təsirlənməyəcək.
Qeyd edək ki, Android nəhəngi 2022 etibarilə özünün bir çox servis və xidmətlərində dəyişiklik etməyə başlayıb. Bunların başında isə özünün tətbiq mağazası gəlir. Milyonlarla tətbiqi özündə cəmləşdirən Google Play Store şirkətin əsas gəlir mənbələrindən biri hesab olunur. Lakin Android ekosisteminin təhlükəsizlik problemləri və şirkətin tətbiqləri yoxlama siyasətində olan boşluqlar səbəbilə zərərli tətbiqlər də bu mağaza vasitəsilə istifadəçilərə əlçatan olur. Buna görə də şirkət öz tətbiq mağazası üçün müxtəlif yeniliklər və dəyişikliklər tətbiq etməyə başlayıb. Mənbələrin qeyd etdiklərinə görə il ərzində Play Store üçün daha böyük yenilənmələr yayımlanacaq. Bundan başqa qeyd edə bilərik ki, hal-hazırda Android 13 üzərində işlər gedir. Əməliyyat sisteminin yeni versiyası I/O konfransında istifadəçilərə təqdim olunacaq. Bu konfrans hər il keçirilir və şirkət bu konfrans ərzində öz məhsulları haqqında müxtəlif təqdimatlar edir. Google ekosisteminə aid bütün məhsullar burada sərgilənir. Güman edilir ki, bu konfrans zamanı da Play Store ilə bağlı bəzi yeniliklər izləyicilərə təqdim oluna bilər.
