Yaşadığımız dünya ilə bağlı bilinən sadə faktlardan biri bir tərəfdə gündüz olarkən, digər tərəfdə gecə olmasıdır. Yəni hər birimiz bilirik ki, dünya əhalisinin yarısı hər hansı bir zaman dilimində gündüzü yaşayırsa, digər yarısı isə gecəni yaşamalıdır. Lakin dünyanın coğrafiyası və insanların yer planetinin hər yerində mövcud olmaması doğru bildiyimiz şeyləri bəzən yanlışa çevirir.
Demək olar ki, hər bir insan bu gün 8 iyul eyni vaxtda birbaşa və ya dolayı yolla günəş işığına məruz qalır. Paylaşılan hesabatlara görə, dünya əhalisinin 99%-lik hissəsi bu gün Azərbaycan vaxtı ilə günorta saat 15:15-də eyni anda günəş işığını görə bilib. Bu gün saat 15:15-də Sakit Okean adaları və Okeaniya bölgəsi istisna olmaqla demək olar ki, bütün məskunlaşmış quru kütlələri birbaşa və ya dolayı yolla günəş işığı alıb.
Təbii ki, bu prosesdə hər bir insanın yaşadığı bölgədə müxtəlif saatlara təsadüf etdiyindən səma tam işıqlı olmayıb. Bu müddətdə dünya əhalisinin bir hissəsi gün batımını seyr edib, digər hissəsi isə gün doğması ilə qarşılaşıb. Qeyd edək ki, günəşin hələ üfüqdə görünmədiyi, çıxdığı və ya batdığı vaxtlarda şüalarının göründüyü vaxtlar hesab edildiyindən bu vəziyyətə aid edilib. Aşağıdakı tvitdə xəritələndirilmiş görüntüsünü də müşayiət edə bilərsiniz.
Gəlinən nəticə yerdəki həyatın necə qarmaşıq şəkildə paylandığının sübutudur. Torpaqların paylanmasına və insanların cəmləşdiyi bölgələrə nəzər saldıqda dünyanı düşündüyümüz qədər əhatə etmədiyimizi görürük. Digər bir tərəfdən şimal yarımkürəsində daha çox insanın yaşaması da bu nəticənin formalaşmasına təməl yaradır.
