Yeni nəsil Android smartfonlarda yeniləmələr əvvəlki qədər çox problemə səbəb olmur. Hətta bəzən smartfonunuzun nə vaxt yeniləndiyindən belə xəbərdar olmursunuz. Çünki, adaptiv olaraq tənzimlənən proqram təminatı əksər hallarda yeniləmə paketlərinin quraşdırılmasını gecə saatlarında həyata keçirir. Eyni zamanda yeniləmə paketlərinin və cihazların da təkmilləşməsi, əvvəli kimi yüksək enerji ehtiyatı kimi tələblərin də problem yaratmaması ilə nəticələnir. Lakin yeniləmələrlə bağlı ən vacib problemlərdən biri gecə də olsa smartfonun müəyyən bir müddət qeyri-işlək vəziyyətdə qalmasıdır. Çoxları üçün bu problem təşkil etməsə də əslində, bu problemin həlli üçün Google 2016-cı ildə uyğun həll yolu hazırlamışdı. Belə ki, Google Pixel modellərində 6 il əvvəl “birbaşa” yeniləmələr metodunu irəli sürmüşdü. Bunun üçün smartfonda A və B sistem bölümü olmaqla əvvəlcədən 2 bölmə yaradılırdı. Smartfonu A sistem bölümündə normal işlətdiyiniz zaman yeniləmə paketi B sistem bölümünə quraşdırılırdı. Beləliklə, smartfonu yenidən başlatdıqda B sistem bölümündən açılan Android əməliyyat sistemi yeniləmə ekranı olmadan birbaşa işlək vəziyyətə gəlirdi. Belə ki, bu xüsusiyyət Android 13 ilə bütün smartfon istehsalçılarının tətbiq edəcəyi bir xüsusiyyətə çevrilir.
Yeniləmə ekranı dövrü başa çatsa da “birbaşa” yeniləmələr bəzi dezavantajlar gətirə bilər
Android 13 əməliyyat sistemi ilə qutudan çıxan smartfonlarda “birbaşa” yeniləmələr metodunun Google tərəfindən məcburi tətbiq edilməsi gözlənilir. Android smartfonlarda yeniləmə ekranı dövrü bu metodla başa çatsa da A sistem bölümünün B sistem bölümünə köçürülməsi daha çox yaddaş yeri tələb edir. Əgər cihazda çox az yaddaş yeri varsa bu metodla yeniləmənin təmin etmək mümkün olmur. Mümkünlüyü üçün isə sistem yaddaşının həcmi normaldan daha artıq ayrılır.
Smartfon istehsalçıları “birbaşa” yeniləmələr metodunun imkanlarından faydalanıb bərpa nöqtəsi deyə bir xüsusiyyət əlavə edə bilərlər. Ən azından smartfonu yenilədikdən sonra xətalarla qarşılaşan və ya bəyənməyən istifadəçi əvvəlki A sistem bölümünə qayıda bilər. Lakin buna da Google şirkəti təhlükəsizlik və.s səbəblərə görə böyük bir ehtimalla icazə verməyəcək. Google tərəfindən qeyd edilir ki, XOR sıxışdırma texnologiyası ilə saxlanılan sistem faylları onsuzda az yer tutduğundan “birbaşa” yeniləmələr ilə B sistem bölümünün yeniləmə üçün ayrılması çox yaddaş yeri tələb etməyəcək. Lakin yenə də ənənəvi üsulla müqayisədə 700mb-3.5GB aralığında bir fərqin yaranacağını söyləmək mümkündür.
Bəs siz nə düşünürsünüz? Sizcə yeniləmə üçün 10 dəqiqə gözləmək, yoxsa Google tərəfindən Android cihazlar üçün məcburi edilməsi gözlənilən bu xüsusiyyət daha yaxşıdır?
