Onlayn formada edilən sifarişlərin artması, insanların alış-verişini oturduğu yerdən etməyə üstünlük verməsi zamanla çatdırmalarda çətinliklər yaradır. Digər bir tərəfdən nəqliyyat xərclərinə daxil olan amilləri də nəzərə alsaq şirkətlərin daim yeni alternativ axtarması məcburi hala çevrilir. Nəqliyyat dedikdə ağlınıza ilk avtomobillər gəlirsə normal haldır. Lakin bir məhsulun çatdırılması üçün ən sürətli daşınma hava yolları ilə həyata keçirilir. Hava nəqliyyatının ən mənfi cəhəti qiymətlərin xeyli yüksək olmasıdır. Bu səbəbdən dronlar bizə kömək ola bilər. Hava daşımaları dedikdə prosesin yalnız təyyarələr vasitəsilə baş verməsinə ehtiyac yoxdur. Belə ki, Amazon şirkəti dronların fəaliyyətini dəyərləndirərək yarımçıq qalmış dron çatdırmaları layihəsini yenidən başladır.
Amazon dron çatdırmaları üçün icazələr almalıdır
Amazon şirkəti sürətlə böyüyərək müxtəlif sektorlara yatırım etməyə davam edir. Şəhər tipli ərazilərdə illərdir avtomobillərlə çatdırmalar etmiş Amazon, indi də daşımaları dronlarla etməyə başlamağa hazırlaşır. Bununla bağlı bir müddət əvvəl işə başlayan şirkət təəssüf ki, planlaşdırdığı kimi irəlilməyi bacarmayıb. Müəyyən çətinliklərə baxmayaraq şirkət layihəni davam etdirməklə bağlı israrlıdır.
Şirkət ilk öncə hava ilə dron daşımaları etmək üçün bəzi icazələr almalıdır. Ona görə də Amazon, Kaliforniyanın Lockeford şəhərində dron ilə çatdırılma etməklə bağlı Federal Aviasiya Administrasiyasına müraciət edib. Əgər şirkət icazə almağı bacararsa çatdırılmalara bu ilin sonlarına doğru balaya bilər.
İl sonuna doğru çatdırmalar başlayarsa paketlər əsasən həyət evlərində yaşayan müştərilərə dronlardan istifadə edilərək göndəriləcək. Çünki, açıq ərazilərdə dronların qalxıb-enməsi nisbətən rahatdır. Bununla bağlı lazımi standartlar da təbii ki, tətbiq ediləcək. Aydın məsələdir bütün bağlamaların dronla daşınması qeyri-mümkündür. Əgər FAA tərəfindən icazə verilərsə firma birinci kiçik yüklərin dron ilə çatdırılmasına çalışacaq.
Amazon-un dronu bir dolu batareya ilə 24km uçacaq. Təqribi 2,4-2,5kq yükləri daşıya biləcək. Şaquli formada qalxa və ya enə bilən dron, havada önə tərəf müəyyən bucaq altında əyilərək üfüqi istiqamətdə sürətli uça bilir. Dron xüsusi təhlükəsizlik sistemlərinə, dərinlik sensorlarına, termal kameraya və.s sahibdir. Uçarkən ağac, naqillər, dirəklər kimi maneələr drona mane olmayacaq. Dronun 2019-cu ildə paylaşılmış videosu ilə aşağıdan tanış ola bilərsiniz.
