Tutalım ki, hər şey artıq hazırdır və təsis etdiyiniz startap müəyyən bir səviyyəyə qədər çatmağı bacarıb. Yaxşı bəs, bir startap üçün ən vacib mərhələlərdən olan təqdimat hissəsinə gəlib çatdıqda nə etməli olduğunuzu bilirsinizmi? Sualı başqa cür versək, təqdimatın nəyə görə vacib olduğunu bilirsinizmi? Təqdimatınız uğurlu alınıbsa, elə qarşısında çıxış etdiyiniz auditoriya daxilində olan potensial investorların diqqətini bir o qədər çox çəkəcəksiniz. Nəticədə layihənizin gələcəyinin ən vacib təməlini bəlkə də elə həmin təqdimatda qoya bilərsiniz. Bunun üçün də bəzi nüansları nəzərə almaq lazımdır.
Startapımız üçün təqdimat hazırlayarkən nələrə diqqət edəcəyik?
Startap ekosistemində təcrübəli təsisçilərin təqdimat zamanı etməyinizi tövsiyə etdiyi ilk şey geyiminizə diqqət etməkdir. Təqdimatınız nə qədər peşəkar olsa da geyiminizin qeyri-ciddi və ya səliqəsiz olması, qarşınızdakı investorlarda ilkin görüş zamanı xoş olmayan təəssüratlar yarada bilər. Təqdimata getməmişdən əvvəl hansı auditoriya qarşısında çıxış edəcəyinizi yaxşı-yaxşı araşdırmalısınız. Müxtəlif sektorlardan olan investorlar üçün sizin startapınız maraqlı gələ bilər və bu müxtəlif sektorlardan suallar deməkdir. Əgər əvvəlcədən kimlərə çıxış edəcəyinizi bilirsinizsə buna uyğun auditoriya hazırlığı etməyiniz vacibdir.
Ənənəvi olaraq verilən suallar isə marketinq strategiyası, maliyyə bölgüsü, komandanız, komandanızın məşğul olduğu fəaliyyətlər, sizə yatırım edərək nə qazanacaqları, onlarla eyni mövqedən necə çıxış edə biləcəyinizlə bağlı və.s olur.
Təqdimatı hazırlayarkən 3 əsas şeyi nəzərə almaq lazımdır. İlk növbədə necə pul qazanacağınızı ən sadə formada başa salmalısınız. Vacib nüans məhz budur. İkincisi isə təqdimat, startap ilə bağlı lazımsız informasiyalara yer verməməli və anlaşılan olmalıdır. Üçüncüsü isə təqdimat düzgün ardıcıllıqla tərtib olunmalıdır. Məsləhət görərdik ki, yeni bir təqdimatı sıfırdan işləmək yerinə araşdırma edib uğurlu təqdimatları özünüz üçün tətbiq edəsiniz.
Təqdimata başldığınız ilk 4 dəqiqə ərzində investorların diqqətini çəkməyi bacarmalısınız. Ona görə də çıxışınız zamanı əlavə detallarla giriş hissəsini çox yükləməyin. Əgər xüsusilə investorlar hədəflənibsə məsləhət görərdik ki, problemi və öz həllinizi göstərib, vaxt itirmədən yuxarıda gələ biləcək sualları nəzərə almaqla həmin suallara cavabı aydın və sürətli şəkildə elə təqdimatı danışarkən özünüz cavablayın. Eyni zamanda məhsulunuzu barədə xoş ilkin təəssürat yaradın.
Ümumilikdə təqdimat boyunca isə 2 detalı “yedirtmək” üçün sizə biraz da bacarıq lazımdır. Bunlardan biri öz unikallığınızı hiss etdirməkdir. Yəni təqdimat hazırldığınız startap bazarda yeganə olmasa belə, ən yaxşısı olduğu hissiyatı yaratmalıdır. Bu da bir növ sizin nitqinizdə verəcəyiniz inam hissiyatına bağlıdır. İkinci detal isə startap hekayəsini təqdimatın hansısa bir hissəsinə yedirtməyi bacarmaqdır. Mütəxəssislər, hekayəni auditoriyanın sıxıldığı vaxt ortaya çıxarmağı məsləhət görürlər. Lakin yenə də hekayə üçün maraqlı bir başlanğıc vermək sizin öz əlinizdədir.
Ümid edirik bütün bunlar startap üçün uğurlu bir təqdimat hazırlamaqda sizin işinzə yarayacaq.
