Əgər yeni bir startap təsis edəcəksinizsə böyük bir ehtimalla sizdən əvvəlki startapların təcrübələrini yaxşı-yaxşı araşdırmaq istəyəcəksiniz. Bunun üçün də ilk növbədə startapların doğru etdiklərinə yox, nəyi yanlış etdiklərinə diqqət etmək lazımdır. Çünki, zamanla təkmilləşdikcə doğruların açarını özünüz də kəşf edə biləcəksiniz. Lakin startap təsisçilərinin atdığı bəzi səhv addımlar var ki, layihənizin tamamilə məhv olmasına qədər gətirib çıxara bilər.
Startap təsis edəcəksinizsə bu səhv addımlardan çəkinmək lazımdır
- Hər şeyi təkbaşına etməyə çalışmaq.
Yalnız bir təsisçisi olan startaplarda uğursuzluq daha yüksəkdir. Belə bir yanaşma var ki, əgər ətrafınızdakı bir qrup bacarıqlı insandan daha yaxşı ola biləcəyinizi ciddi düşünürsünüzsə, deməli problem elə siz ola bilərsiniz. Ona görə komandanıza güvənib startap təsis edərkən belə bir səhv etməyin. - Həddindən artıq məsuliyyət götürmək
Startap təsisçiləri maliyyə, insan resursları, reklam, əməliyyatlar, işə götürmə, işdən çıxarma, satış, PR kimi hər şeyə cavabdehdirlər. Yaxşı bir lider səlahiyyət verməyin yolunu bilməlidir. Məsuliyyətə həvəsli olmaq həddindən artıq stressə və tam fiziki tükənməyə səbəb ola bilər. - Məsuliyyətdən yayınmaq
Ətrafında bir komandanın olması təsisçinin bütün işləri boynundan atması anlamına gəlməməlidir. Startap üzvləri arasında işlər bölüşüdürülərkən, hamı kimi təsisçi də öz vacib məsuliyyətlərini dərk etməlidir. - Düzgün insanları işə götürməmək
Komandanız üçün düzgün insanları tapmaq çox vaxt apara bilər. Müəyyən bir vəzifə üçün ən azı 5-7 insan ilə müsahibə aparmamış kimisə işə götürməyin. Özünüzü parlaq, istedadlı, dürüst və şirkətinizə sadiq bir komanda ilə əhatə edin. - Düzgün müştəriləri hədəf etməmək
Startap öz hədəf bazarını müəyyən etməlidir. Əgər yaxşı hazırlanmış strategiyanız yoxdursa, dəqiq hədəf auditoriyasını müəyyən etmək üçün çoxlu araşdırma, istifadəçi testi etmək və varsa statistikaları araşdırmaq vacibdir. - Komanda üzvlərinin fikirlərinə laqeyd yanaşmaq
Bir çox startap təsisçisi uğur qazana bilmir, çünki yüksək təhsilli və ətraflarında geniş məlumatlı insanlardan məsləhət almağı seçmirlər. Hər şeyi bilmək mümkün deyil. Ətrafdakılarınızdan da məsləhət almağa çalışın və onlara onların fikirlərini qəbul edəcəyinizi hiss etdirin. - Gələcək üçün plan qurmamaq
Statistik göstəricilərə əsasən, startap təsisçilərinin ən çox atdığı səhv addımlar düzgün qurulmamış strateji plandan qaynaqlanır. Gələcək üçün nə vaxt hansı addımları atacağınızı əvvəlcədən özünüz üçün mütləq qeyd edin. - Hər bir iş üçün tamamlama müddəti qoyun
Başladığınız layihəni ən qısa vaxt ərzində tamamlamaq həmin işdə qazanacağınız uğura sizi bir addım daha yaxınlaşdırır. Ona görə də 7-ci addımda dediyimiz kimi, hər bir iş üçün plan qurun və planınızda işin tamamlanma müddətini də qeyd edin. - Zəif nöqtəyə sahib olmamaq
Yaxşı təsisçi öz qüsurlarını etiraf etmə bacarığına sahib olmalıdır. Ən yaxşı keyfiyyətlərinizə diqqət yetirin və problemlərinizin hansı yerlərdə olduğunu görməyə çalışın. Hansı tip lider olmaq istədiyinizi düşünün. Məsuliyyət sizin əlinizdə olduğu üçün fikirlərinizin komandanızdan daha çox yer tutmamasına diqqət edin. - Uyğunlaşa bilməmə problemi
Startaplar dəyişə bilən, dəyişən şərtlərə uyğunlaşa bilən və müştəri ehtiyaclarına uyğun məhsullar istehsal etməlidirlər.
Bütün bunlar startap təsisçilərinin diqqət etməli olduğu və startap ekosisteminin vacib hesab ediləcək 10 kritik səhv nümunəsi hesab edilir. Bu qeydlərə diqqət edəcəyiniz təqdirdə startapınızın uğuru üçün vacib addımları atmış olacaqsınız.
