Dekabrın 9-da ADA Universitetində Azərbaycan Respublikası Elm və Təhsil Nazirliyi və “Alqoritmika” beynəlxalq riyaziyyat və proqramlaşdırma məktəbi ilə birgə “Kod Saatı” qlobal hərəkatı çərçivəsində informatika təmayüllü X-XI sinif şagirdlərinin həvəsləndirilməsi və rəqəmsal bilik səviyyəsinin artırılmasına dəstək məqsədi ilə İnfosessiya həyata keçirilib.
“Kod saatı” hərəkatının əsas məqsədi İT sahəsini məktəblilər arasında təşviqat aparmaq, şagirdlərin və onların valideynlərinin diqqətini informasiya texnologiyaları ilə bağlı peşələrə cəlb etməkdir.
Tədbirdə müxtəlif İT sahələri üzrə ekspert və mütəxəssislər öz iş təcrübələrini auditoriya ilə bölüşərək, rəqəmsal mühit, startup-lar, uğurlu rəqəmsal peşələr, yerli və xarici universitetlərdə İT ixtisaslar və s. mövzularla bağlı çıxışlar təqdim ediblər.
Belə ki, tədbirin açılışını edən “Rəqəmsal Bacarıqlar” layihəsinin rəhbəri Nilüfər Rəhimova Kod Saatı: “Rəqəmsal gələcəyə addım” müsabiqəsi barədə geniş məlumat verib. O bildirib ki, müsabiqə müddətində bir sıra tədbirlər və fəaliyyətlər, həmçinin regionlarda kodlaşdırma üçün açıq qapı günlərinin keçirilməsi də planlaşdırılır.
Eyni zamanda N.Rəhimova çıxışı zamanı onu da qeyd edib ki, “Rəqəmsal Bacarıqlar” layihəsi, cari ildə 410000-ə yaxın şagirdi əhatə edib, 29000-ə yaxın şagird isə Kod Saatı: “Rəqəmsal gələcəyə addım” müsabiqəsinə qoşulub.
Daha sonra AR Elm və Təhsil Nazirliyinin nümayəndəsi Nurlan İsmayılbəyli bildirib ki, rəqəmsal bacarıqlar təkcə gələcəyin deyil, həm də günümüzün tələbidir. Bu nöqteyi nəzərdən N.İsmayılbəyli, Azərbaycan Respublikasının 2024-2026-cı illər üzrə “Strateji İnkişaf Planı” na əsasən təhsil sahəsi üzrə qeyd olunan məqamlardan biri də məhz “Rəqəmsal bacarıqlar” layihəsi ilə bağlı olduğunu qeyd edib.
Tədbirdə iştirak edən ADA Universitetinin İT və mühəndislik fakültəsinin dekanı Abzatdin Adamov gələcəyin tələbələrinə müasir cəmiyyətdə İT mühəndisliyinin əhəmiyyəti ilə bağlı geniş çıxış təqdim edib. Daha sonra A.Adamov şagirlərdən gələn sualları cavablandıraraq onlara öz tövsiyələrini verib.
Tədbirdə növbəti çıxış edən Azərbaycan Dövlət Neft və Sənaye Universitetinin rəsmisi və “Eazi START” Startup və İnnovasiya Mərkəzinin koordinatoru Elviz İsmayılov hazırda gənclərin daha çox marağına səbəb olan İnnovasiya və Startup-lar mövzusunda təqdimat edib.
Qeyd edək ki, informatika təmayüllü X-XI sinif şagirdlərin gələcək universitet seçimi üçün doğru istiqamət vermək infosessiyanın əsas vəzifələrindən biridir. Bu mövzu ilə bağlı “ROOF Academic Training”in təsisçisi və icraçı direktoru, təhsil konsultantı Rüfət Hüseynzadə top universitetlərdə təhsil, peşə seçimində tələblər və qaydalarla bağlı təqdimat edib və auditoriyadan gələn çoxsaylı sualları cavablandırıb.
Gələcəyin tələbələri olan şagirdlərə uğurlu peşə seçimində təcrübə və motivasiya da mütləqdir. Bu istiqamətdə texnobloger, Tedroid Media Group – da həmtəsisçi və idarəedici tərəfdaş Tarıyel Ağazadə auditoriyada ruh yüksəkliyi yaradacaq, əslində uğursuzluqlardan qorxmamaq və hədəflərinə gedən yolda çətinlikləri aşa bilməklə bağlı şəxsi təcrübəsini auditoriya ilə bölüşüb.
Tədbirin infossesiya bölməsində ADA Universitetinin tələbə qəbulu şöbəsinin əməkdaşı Günel Muxtarova ADA Universitetində ixtisaslar, qəbul şərtləri və təqaüd imkanları barədə məlumat verib.
Sonda isə ADA Universitetinə İnformasiya Texnologiyaları istiqamətində təhsil alan və uğurlarının artıq başlanğıcını yaşayan tələbələr çıxış edərək iştirak etdikləri layihələr şagirdlərlə bölüşüb.
Qeyd edək ki, infossesiyada 300-ə yaxın paytaxt və region üzrə informatika təmayüllü siniflərdə təhsil alan X-XI sinif şagirdləri iştirak edib.
