Bildiyimiz kimi Apple bir neçə müddətdir ki, yeni nəsil CarPlay sistemi üzərində çalışırdı. İndi məlum olub ki, Apple şirkətinin yeni nəsil CarPlay sistemi ilk olaraq Aston Martin və Porsche avtomobillərində istifadə olunacaq. Ümumiyyətlə Uzun müddətdir həyatımızda olan Apple CarPlay sistemi iPhone-ları avtomobillərə qoşmaqda ixtisaslaşıb. Lakin istifadəçilər bu sistemin məhdud imkanlara sahib olduğuna görə şikayətlənirdi. Məhz Apple şirkəti də tamamilə yeni CarPlay ilə bütün şikayətləri nəzərə alaraq məhdudiyyətləri aradan qaldırıb.
Yeni nəsil Apple CarPlay qabaqcıl xüsusiyyətlərə sahib olacaq və ilk mərhələdə Aston Martin və Porsche tərəfindən istifadə ediləcək. Belə ki, Aston Martin brendi yeni DB12 modeli də daxil olmaqla 2024-cü ildə yeni nəsil CarPlay sisteminə sahib avtomobilləri təqdim edəcəyini açıqlayıb. O cümlədən alman avtomobil nəhəngi Porsche də yeni nəsil sistemdən istifadə edəcəyini yuxarıdakı görüntüləri paylaşmaqla açıqlayıb. Lakin avtomobil nəhəngi hələlik müəyyən model adı çəkmədi və Aston Martin kimi tarix vermədi.
Qeyd edək ki, WWDC22-də təqdim edilən yeni sistem nəqliyyat vasitələri ilə dərin bağlantı yaradacaq və məhdudiyyətləri aradan qaldıracaq. Apple bildirir ki, “CarPlay insanların nəqliyyat vasitələri ilə qarşılıqlı əlaqəsində əsaslı dəyişiklik yaratdı. Yeni nəsil CarPlay avtomobilin avadanlıqları ilə dərin inteqrasiya təmin etməklə daha da irəli gedir. CarPlay, məzmunu avtomobilin bir neçə ekranında göstərə bilməklə unikal və ardıcıl təcrübə yaradacaq”. Bundan əlavə CarPlay sürət, yanacaq səviyyəsi, temperatur və bir çox digər məlumatları idarə panelində əks etdirmək üçün avtomobil məlumatlarından istifadə edəcək.
