Startapların investisiya əlçatanlığı üçün yeni maliyyə mexanizmləri düşünülür. Belə ki, bu barədə Rəqəmsal İnkişaf və Nəqliyyat Nazirliyi yanında İnnovasiya və Rəqəmsal İnkişaf Agentliyinin sədri İnarə Vəliyeva “Report” resursuna müsahibəsində İKT sektoru üzrə qarşıdakı hədəflər, atılacaq addımlar barədə danışıb.
İlk növbədə “Caucasus Ventures” bu günə qədər startaplara 1 milyon ABŞ dollardan çox (təqribən 1.3 milyon) dəyərində maliyyə dəstəyi göstərib. Dünya təcrübəsinə nəzər salmış olsaq, normalda bir fondun il ərzində 5-6 startapa maliyyə dəstəyi göstərəcəyi gözlənilir. “Caucasus Ventures” fondu təxminən 50-100 min ABŞ dolları dəyərində investisiya edir. Ondan daha az olduğu təqdirdə başlanğıc mərhələdə olan startaplara investisiya almaq mümkün olsa da, kifayət qədər çətinləşir. Paralel olaraq 100 min ABŞ dollarından yuxarı investisiya almaq mexanizmləri də nəzərdən keçirilir. Yeni maliyyələşmə mexanizmləri üzrə ortaq oluna biləcək xarici fondların müəyyən olunması və ölkəyə gətirilməsi hədəflənir.
İnarə Vəliyeva bildirir ki, hər hansı bir ölkədə İKT sahəsinin davamlı inkişafını təmin etmək üçün əmək qabiliyyətli əhalinin ən azı 6%-nin bu sahədə çalışması labüddür. Azərbaycana nəzər salmış olsaq görərik ki, bizdə bu gün həmin göstərici 1%-nin altındadır. İnnovasiya və Rəqəmsal İnkişaf Agentliyi olaraq İKT üzrə kadr potensialının artırılması üzrə intensiv işlərə davam edirik. İllər üzrə təqaüdçü adını qazanmış şəxslərin sayına nəzər salsaq, 2021-ci ildə — 671, 2022-ci ildə — 782, 2023-cü ildə — 4 006 nəfərə təqaüd ayrılıb. Bu rəqəmin 2024 –cü ildə 5 000 olması hədəflənir.
Müsahibə ilə bağlı daha ətraflı məlumat sahibi olmaq istəyirsinizsə, İnarə Vəliyevanın “Report” -a müsahibəsinə keçid edə bilərsiniz.
