Elektromobil dünyasının lider istehsalçısı olan Tesla şirkəti bazara daxil olduqdan bu yana özünü məhz texnologiyaları hesabına sevdirib. Yaxın 10 illiyə baxsaq 2012-ci ilin elə bu günündə belə ənənəvi avtomobil istehsalçıları elektromobillərə soyuq yanaşırdı. Lakin Tesla şirkətinin avtomobil anlayışı ilə texnologiyanı bir yerdə harmoniya etməsi sektoru demək olar kökündən dəyişdirdi. Bu gün Tesla-nın satışları o həddə çatıb ki, ötən əsrdən bazarda olan markalar satış ədədlərinə görə Tesla-dan xeyli geri qalır. Tesla bunu ilk növbədə öz avtopilot sisteminə borcludur. Çünki, avtomobili alan insanların böyük bir əksəriyyəti “Niyə Tesla?” sualına cavab olaraq elektromobillərin avtopilot sistemini göstərir. Tesla şirkətinin avtopilot sistemini isə digər nəhəng avtomobil istehsalçılarının avtopilot sistemindən ayıran və mükəmməl edən bəzi nüanslar var.
Tesla şirkətinin avtopilot sistemi nəyə görə hamısından üstündür?
İnsanların avtomobili avtopilot sisteminə etibar etməməsinin əsas səbəbi avtopilotların çox “ağılsız” olmasıdır. Məsələn, əksər firmalar avtopilot sistemi üçün müəyyən bir regionu LIDAR tipli sensorlarla layihələndirir və avtomobilin həmin yollarda hərəkət etməsini təmin edir. Bir növ əvvəlcədən avtopilotun gedəcəyi yerlər verilənlər bazasına, loru dildə xəritəyə əlavə edilməyibsə avtopilot həmin yerdə çox vaxt sərbəst hərəkət edə bilmir. Bacardığı maksimum şey 2 cərgənin arasını izləmək olur. Tesla şirkəti isə tamamilə fərqli və bir o qədər də bənzər innovativ texnologiya tətbiq edir. Gəlin ən sadə formada anlayacağınız şəkildə Tesla şirkətinin Avtopilot sisteminə nəzər salaq.
Belə ki, digər firmalar çox vaxt avtopilota “yeməyi bişirib verir”. Lakin Tesla avtopilot sisteminə “yeməyi özü bişirməyi” öyrədir. Tesla şirkətinin avtopilotda əsas üstünlüyü avtopilot sistemini istənilən yol şəraitində hərəkət edə bilməsi üçün canlı şəraitə görə öyrətməsidir. Ona görə avtopilot xəritələndirilməmiş yerlərdə belə nə edəcəyinə özü qərar verməyi bacarır. Nəticədə yolda qoşa xətt olmasa öz cərgəsini tutub gedir və ya “yolun ortasında dayanan sürücü olduqda” yanından ötüb keçməli olduğunu bilir və.s.
Eyni zamanda Tesla modelləri bunu son illərə qədər yalnız kameralar vasitəsilə etməyi bacarıb. Yaxşı bəs, xəritləndirmə heç olmayıbmı desəniz, bəli olub. Amma xəritələndirməni də demək olar avtomobillər özləri hərəkət edərkən həyata keçirib. Tutalım Tesla Model S heç vaxt keçmədiyi küçədən avtopilot ilə və ya sürücü idarəsində ilk dəfədir keçir. Bu zaman kameralar vasitəsilə hərəkət etdiyi yolda topladıği məlumatları verilənlər bazasına ötürür. Gələn dəfə oradan keçən fərqli bir Tesla bu məlumatı həm istifadə edir, həm də təkmilləşdirir.
Tesla tərəfindən verilən məlumata görə “Tam Avtonom Avtopilot (BETA)” sistemi Tesla modellərində indiyə qədər 56 000 000 Km-dən çox məsafə qət edib. Bu rəqəm ümumilikdə 100.000 avtomobil vasitəsilə toplanıb ki, bu rəqəm böyük görünsə də əslində çox azdır. Səbəbi isə, FSD (tam avtonom) idarə etmə paketinin hələ hər kəs üçün əlçatan olmamasıdır. Üstəlik bu məsafənin 48 000 000 Km-lik hissəsi FSD sisteminin çoxları üçün istifadəyə verildiyi son 7 ay ərzində qeydə alınıb. Müqayisə üçün, avtopilot testləri cəhətdən ən yaxın rəqiblərindən olan Alphabet Waymo 12 ildə təqribi 32 000 000 Km məsafə qət edə bilib.
Whole Mars Catalog YouTube kanalı tərəfindən çəkilmiş Avtopilot ilə sürüş nümunələrindən biri:
