ChatGPT dil modelinin uğuru arxasındakı nailiyyət: Buz dağının görünməyən tərəfində dəyərlənən şirkət, NVIDIA!

“OpenAI şirkətinin ChatGPT dil modeli mükəmməl cavabları ilə süni intellekt dünyasını bir-birinə qarışdırdı. Uğurun arxasındakı nailiyyətin sirlərindən biri də NVIDIA idi. Sahəsində dünya lideri şirkətin süni intellekt əsaslı texnologiyaları həm ChatGPT kimi həllərə öz töhfəsini verdi, həm də eyni zamanda şirkətin öz səhmlərinə möhtəşəm təsirlə yadda qaldı. Yaxşı bəs, detallar nədən ibarət idi?”

Son ayların ən populyar mövzusu süni intellekt ətrafında ChatGPT dil modelidir. OpenAI şirkətinin hazırlamış olduğu ChatGPT öz populyarlığının arxasında insanlar üçün gələcəyə yeni bir pəncərə açır. Lakin eyni zamanda sahib olduğu imkanlar ilə sadəcə insanlara yox, nəhəng şirkətlərə də xeyir üzərinə xeyir gətirməyə davam edir. Təbii ki, xeyir qazanan şirkətlər də özlüyündə dil modelinin potensialını əvvəlcədən görmüş, OpenAI şirkətinin fəaliyyətində dəyərə dəyər qataraq vacib rol oynamaqla fərqləniblər. Məsələn, onlardan ən populyarı olan Microsoft Corporation ola bilər ki, ötən həftələrdə ChatGPT dil modelinin təkmilləşməsi üçün bütün vacib xidmətlərini əlçatan etmiş və hətta 10 milyard dollar ətrafında sərmaye qoyulacağı bildirilmişdi. Hesablamalar əsasən, yaxın illərdə OpenAI şirkəti ilə əlaqədə olan və məhsullarına aid hissələri əldə etmiş şirkətlərin də qazancı artmağa davam edəcək. Bu sahədə isə qazanan tək texnologiya nəhəngi Microsoft deyil. Aydın məsələdir söhbət, töhfəni birbaşa öz texnologiyaları ilə vermiş NVIDIA şirkətindən gedir.

Adı çox az çəkilsə də son həftələrdə gündəmə gəlməsi ilə NVIDIA da ChatGPT kimi dil modellərinin inkişafı üzərindən çox ciddi şəkildə faydalanan şirkətlərdəndir. Belə ki, NVIDIA və OpenAI da innovasiyalarını təkmilləşdirmək və süni intellekt sahəsini inkişaf etdirmək üçün strateji tərəfdaşlığa sahibdirlər. NVIDIA şirkəti hamımızın bildiyi kimi qrafik kartlar (GPU) başda olmaqla kompüter avadanlığının istehsalında ixtisaslaşan aparıcı texnoloji şirkətdir. İki şirkət arasındakı əlaqələr süni intellektdə əhəmiyyətli irəliləyişlər əldə etməyə və qabaqcıl AI imkanları yaratmağa buz dağının arxa planında təsir edən ən vacib şeydir. Yaxşı bəs, NVIDIA şirkətinin buz dağının arxasında gördüyü çox vacib iş nədən ibarətdir? ChatGPT dil modelinin timsalında NVIDIA şirkətinin qrafik kart istehsalı şirkəti süni intellekt sektorunda necə vacib bir oyunçuya çevirir?

NVIDIA texnologiyaları ChatGPT timsalında düşünmədiyiniz qədər vaciblik təşkil edir

Süni intellekt bazarının davamlı böyüməsi, NVIDIA şirkətinin süni intellekt istiqamətli GPU texnologiyalarına tələbin artması ilə bu həlləri yaradan şirkətlərlə əlaqənin güclənməsinə gətirib çıxarır. Heç şübhə yoxdur ki, Hopper H100 və Ampere A100 arxitekturaları ilə NVIDIA bazarın ən yüksək performanslı AI qrafik kartlarına sahibdir. 4nm TSMC texnoloji prosesi üzərinə inşa edilmiş xüsusi GPU modelləri 80 milyard tranzistor mövcuddur ki, 67 TFLOPS həcmdə FP32 prosesslərin görülməsini belə son aldığı yeniləmədən sonra mümkün edir. Bu emal gücü isə bir süni intellekt, dil modeli və.s hazırlamaqda ciddi bir varlıq deməkdir. Həmin AI qrafik kartlarının imkanlarını səhifənin sonundakı cədvəldə də detallı görə bilərsiniz.

OpenAI-nin dil modeli ChatGPT, mətn kimi verilənlər sətrini yaratmaq və idarə etmək üçün nəzərdə tutulmuş “Transformer” arxitekturasından istifadə edir. Belə böyük dil modellərinin mətn, söz yaradılmasında təlimi və proseslərin işlənməsi üçün xüsusi kateqoriyalı yüksək performanslı emal gücünə malik qrafik kartlardan yararlanılır. Təlimdən əlavə, nəticə və sorğulara cavab yaratmaqda da ChatGPT dil modeli GPU gücü tələb edir. Prosesin hesablama baxımından intensiv olması üçün eyni zamanda real vaxt rejimində cavab yaratmağa imkan verən GPU sürətləndirməsindən də istifadə edilir.

Nəticədə NVIDIA texnologiyaları OpenAI şirkətini ChatGPT dil modelinin həm hazırlanmasında, həm də nəticələrin formalaşdırılmasında mühüm rol oynayır. NVIDIA qrafik kartları paralel olaraq işləyə bilən çox sayda nüvəyə malik olduğundan, əməliyyatları ənənəvi təkmlləşdirilmiş prosessorlar ilə nisbətdə daha sürətli yerinə yetirməyə imkan verir. Yəni ən sadə formada, ChatGPT kimi böyük AI modelinin hazırlanması CPU-larla müqayisədə GPU-larla daha sürətli həyata keçirilə bilər. Bundan əlavə, qrafik kartlar təlim prosesi zamanı aralıq nəticələri saxlamaq vacib olan yüksək sürətli və təsəvvür etdiyinizdən belə daha büyük “DRAM” yaddaşa malikdir. Bu yaddaş prosessorlar ilə müqayisədə, qrafik kartlarla daha sürətli məlumat əldə etmək və emal etmək imkanı formalaşdırır.

NVIDIA qrafik kartlarının istifadəsi təlim vaxtını azaltmağa kömək etməkdən əlavə, nəticə çıxararkən real vaxt rejimində cavaba da imkan verir. Dolayı olaraq arxa planda yüksək hesablama gücü ilə NVIDIA texologiyalarının işlədilməsi ChatGPT-ni praktik və güclü AI alətinə çevirir.

ChtGPT və NVIDIA bağlılığının arxa fonuna nəzər yetirdikdən sonra mövzunun bir də maddi tərəfindən baxmaqda fayda var. Çünki, aparılan araşdırmalar göstərir ki, GPT-3 əsaslı dil modeli süni intellekt ilə əlaqədar peşəkar mühitdə müəyyən qədər kiçik bir “diametrə” sahib imiş kimi görünsə də, xüsusilə Google Bard ilə əlaqədar testlər yayımlandıqda “diametrin” çox əhəmiyyətli olmadığı ortaya çıxır. Bəli, OpenAI tərəfindən hal-hazırda ictimaiyyətə açıq olan ChatGPT bəlkə də Google Bard qədər geniş verilənlər bazasına sahib deyil. Lakin OpenAI özünün dil modelini o qədər yaxşı təkmilləşdirib ki, çox az adam nə tərtib olunmuş yazıların keyfiyyətindən, nə dil modelinin 2021-ci ildən sonrakı məlumatları əldə etməməsindən, nə də yazıların çox da etibarsız olmasından şikayət edir və ya narazıdır. İndi GPT-4 ilə işlərin necə daha da təkmili vəziyyət alacağını özünüz təsəvvür etməlisiniz.

ChatGPT dil modelindən əlavə OpenAI şirkətinə məxsus Dall-E süni intellekti də olduqca böyük dəyərə malikdir. Hal-hazırda yuxarıda bəhs etdiyimiz mövzular istiqamətində də son aylarda NVIDIA şirkəti əziyyətinin bəhrəsini toplamağı bacarır. Önümüzdəki dövrdə süni intellekt yönümlü NVIDIA texnologiyalarına tələbatın artacağı gözləntiləri şirkətin səhmlərinin dəyərini artırıb. Firma cəmi bir ay ərzində səhmlərində təqribi 40% artım görüb. Şirkətin baş icraçı direktoru Jensen Huang bu il 18,9 milyard dollar sərvəti ilə ən sürətlə böyüyən milyarderi hesab olunur. İl ərzində süni intellekt texnologiyalarına maraq daha da artacaq və NVIDIA şirkəti haqlı olaraq böyüməyə davam edəcək. Analitiklərin fikinrcə ChatGPT dil modelinin böyüməyə davam etdikcə 2023-cü il ərzində daha çox NVIDIA qrafik kartlarının satışı ilə nəticələnəcək. Satışlar 3-11 milyard dollar arasında qiymətləndirilir. Bank of America və Wells Fargo analitikləri də NVIDIA şirkətinin AI və ChatGPT biznesi ətrafında populyarlıq qazanacağını bildirilir. Yekunlaşdırsaq, bütün bunlar NVIDIA üçün gələcək dövrdə ideal nəticələr vəd edir.