Həm sualtı dronlar, həm də standart uçan dronlar yüksək inkişaf etmiş funksiyalar təklif edir. Bu vaxta həm sualtında fəaliyyət göstərib həm də uça bilən dronlar yox idi. İndi isə yeni hazırlanmış TJ-FlyingFish artıq bu boşluğu aradan qaldırır.
Hal-hazırda funksional prototip olan TJ-FlyingFish Çinin Şanxay İntellektual Avtonom Sistemləri Tədqiqat İnstitutu, Tongji Universiteti və Honq-Konq Çin Universitetinin İnsansız Sistemlər Tədqiqat Qrupunun alimlər qrupu tərəfindən hazırlanıb. İlk baxışdan adi dron kimi görünən TJ-FlyingFish nəinki uça bilir, eyni zamanda suda istənilən cür hərəkət etməyi bacarır. Həmçinin, Honq-Konq Çin Universitetinin professoru Ben Çen sözügedən dronun tam avtonom olduğunu və onun amfibiya səyahətinin heç bir nöqtəsində insana ehtiyac duymadığını deyir.
TJ-FlyingFish dronunun dörd hərəkət edən pərvanəsi var. Bu pərvanələr, adi dronlarda gördüyümüz kimi, cihazın havaya qalxmasına və uçmasına imkan verir. Lakin onların hərəkətli mexanizmi olduğundan su altında istiqamət və sürətləndirmə əməliyyatları üçün də istifadə oluna bilər. Üstəlik, bu vasitə artıq havada olduğu halda, heç bir xarici faktor olmadan birbaşa suyun altına girə bilir. Eynilə, heç bir xarici faktor olmadan sudan çıxa bilir. Beləliklə, bu qabiliyyət onu bəzi kritik axtarış və xilasetmə fəaliyyətləri üçün də vacib alətə çevirir.
Hazırkı konsept hazırda kiçik prototip kimi sınaqdan keçirilir. Cihazın çəkisi 1,63 kiloqramdır və hələlik tam şarjla havada 6 dəqiqə qala bilir. Su altında tam doldurma qabiliyyəti ilə 40 dəqiqəlik ömür təklif edir. Dron maksimum 3 metr dərinliyə enə bildiyi halda, saniyədə 2 metr sürətlə hərəkət edə bilir. TJ-FlyingFish adlı dronun səyahət və keçid zamanı insan toxunuşuna ehtiyac duymaması onu elmi araşdırmalar və ya məzmun yaradıcıları və kino dünyası kimi sahələr üçün yararlı edir.
