Microsof, OpenAI ilə uzunmüddətli tərəfdaşlığını milyardlarla dollarlıq investisiya hesabına genişləndirdiyini açıqlayıb. Belə ki, bu açıqlama Microsoft şirkətinin OpenAI şirkətinə 10 milyard dollar sərmayə qoyması xəbərindən bir neçə həftə sonra verilib. Hal-hazırda bir çox yerdə sərmayənin məbləğinin 10 milyard dollar olduğu yazılsa da, şirkətin rəsmi açıqlamasında bu barədə heç bir məlumat mövcud deyil.
Microsoft prezidenti və baş icraçı direktoru Satya Nadella OpenAI ilə əməkdaşlığı son texnoloji süni intellekt araşdırmalarını məsuliyyətli bir şəkildə inkişaf etdirmək və süni intellekti yeni bir texnoloji platforma olaraq inkişaf etdirmək üçün ortaq bir hədəf ətrafında qurduqlarını bildirib. Tərəfdaşlığın növbəti mərhələsində bütün sənayelər üzrə tərtibatçılar və təşkilatlar Azure ilə ən yaxşı süni intellekt infrastrukturu, modelləri və alətlər əldə edəcəkləri qeyd edildi.
OpenAI baş direktoru Sem Altman, əməkdaşlığın son üç il ərzində çox yaxşı olduğunu deyib və əlavə edib ki, Microsoft OpenAI-nin dəyərlərini bölüşür və müstəqil tədqiqatlarını davam etdirmək, o cümlədən hamı üçün faydalı olan qabaqcıl AI xidmətləri yaratmaqdan məmnundur. İki şirkət arasındakı razılaşma şirkətlərin tədqiqatlarına kömək etmək üçün super hesablama sistemlərinin inkişafı və tətbiqinə investisiyalarını artırmağa imkan verəcək. Müqavilənin ən mühüm hissəsi Microsoft şirkətinin OpenAI üçün şəxsi bulud xidmətini açmasıdır və Microsoft şirkətinin bulud xidmətləri məhsullar, API xidmətləri və tədqiqatlar üzrə bütün OpenAI iş yüklərini gücləndirəcək.
Microsoft həmçinin əməkdaşlıq etdiyi şirkətin modellərini müxtəlif istehlakçı və müəssisə məhsullarına yerləşdirməyi də planlaşdırır. Microsoft şirkətinin Bing axtarış nəticələrinə ChatGPT inteqrasiyasını əlavə edərək Google-a meydan oxumağa hazırlaşdığı xəbərini də daha əvvəl sizinlə bölüşmüşük. Həmçinin şirkətin bəzi süni intellekt texnologiyalarını Word, PowerPoint və Outlook proqramlarına inteqrasiya edəcəyi də deyilir.
Bir başqa yenilik də budur ki, OpenAI istifadəçilərə ChatGPT-nin ödənişli versiyasını təqdim etməyə başlayıb. Doğrudur ki, şirkət hələ ChatGPT-nin ödənişli versiyası ilə bağlı ciddi işlər ortaya qoymayıb. Lakin ChatGPT Professional adlı çat-bot üçün aylıq qiyməti 42 dollar olan məbləğ tələb ediməyə başlanır. Standart çat-botdan ilə müqayisədə daha yaxşılaşdırılmış xüsusiyyətlərə malik Professional versiyasının rəsmi olaraq nə zaman və hansı qiymətə təqdim ediləcəyi barədə hələ ki, məlumat yoxdur.
Startap ekosistemi xəbərlərini "İnformasiya və Rəqəmsal İnkişaf Agentliyi" ilə tərəfdaşlığımız çərçivəsində oxuyursunuz.
