Şəhərlərdə havanın çirklənməsi getdikcə daha böyük problemə çevrilir. Dünya İqtisadi Forumunun dərc etdiyi hesabata görə, böyük şəhərlərdə yaşayan insanlar heç vaxt siqaret çəkməsələr belə, təmiz bölgələrdə mütəmadi siqaret çəkən adam kimi çirklənmiş ciyərlərə malik olurlar. Arpa Lombardia ətraf mühitin mühafizəsi agentliyinin məlumatlarına görə, siqaret tüstüsü incə toz emissiyalarının (PM10) 7%-dən məsuldur. Atmosferin tozla çirklənməsinin əhəmiyyətli bir hissəsi nəqliyyat, kənd təsərrüfatı, enerji istehsalı və sənaye prosesləri kimi antropogen toz mənbələrindən qaynaqlanır. Bununla belə, agentliyin məlumatına görə, siqaret də mühüm rol oynayır. Bu çirklənmə müxtəlif ağciyər və ya tənəffüs xəstəliklərinə səbəb ola bilər.
Bu məlumatların fonunda İtaliya, Milan daxilində 1 yanvar 2025-ci il tarixindən açıq yerlərdə siqaret çəkməyi tamamilə qadağan edəcəyini açıqlayıb. Bu çərçivədə, bütün ictimai yerlərdə və ya ictimai istifadə üçün ayrılmış açıq yerlərdə siqaret çəkmək qadağan ediləcək. Ancaq siqaret çəkmək istəyənlər bunu başqa insanlardan 10 metr məsafə saxlaya biləcəkləri təcrid olunmuş yerlərdə çəkə biləcəklər.
2020-ci ildə Milan Şəhər Şurası tərəfindən təsdiq edilən Hava Keyfiyyəti Qaydası ilə havanın çirklənməsi ilə mübarizə planı 2021-ci ildə müəyyən ərazilərlə məhdudlaşaraq həyata keçirilməyə başlandı. İctimai nəqliyyat dayanacaqları, parklar, yaşıllıqlar, qəbiristanlıqlar və idman obyektləri kimi yerlərdə siqaret çəkmək qadağan edilidi. Lakin 2025-ci il yanvarın 1-dən etibarən bu qadağa küçə və yollar da daxil olmaqla bütün açıq yerlərə şamil edilir.
Qadağa yalnız tütün məmulatlarını əhatə edir. Elektron siqaretlər bu qaydadan çıxarılır. Ətraf Mühit və Yaşıl Ərazilər Şurasının üzvü Elena Qrandi bu tənzimləmənin təkcə qadağa deyil, həm də sağlamlığa zərərli vərdişlərdən uzaqlaşmaq üçün bir maarifləndirmə addımı olduğunu bildirib. Ümumdünya Səhiyyə Təşkilatının (ÜST) rəqəmlərinə görə, hər il təxminən 7 milyon insan ətraf mühitin çirklənməsi ilə bağlı xəstəliklərdən ölür.
