Əgər nə vaxtsa nüvə müharibəsi başlasa yəqin ki, yaşanacaqların necə acınacaqlı olacağını təsvvür etmək çətin deyil. Bir neçə gün, bəlkə də bir həftə ərzində bir neçə ölkə arasında nüvə silahlarının atılması sürətlə fəlakətli itkilərlə nəticələnir. Əgər belə birşey olsaydı “bundan sonra nə baş verərdi?” deyən tədqiqatçılar mövzunu araşdırmağa çalışıblar.
Nüvə müharibəsi ilə bağlı mövcud fərziyyələrin çoxu bombardmanın özünün dəhşətlərinə diqqət yetirsə də, ABŞ-ın Rutgers Universitetinin tədqiqatçıları tərəfindən aparılan bu araşdırma, əsl əzabın münaqişədən sonrakı illərdə, təchizatın kəsildiyi zaman baş verəcəyini göstərir. Təchizat zəncirlərinin və yerli infrastrukturun dağılması ərzaq məhsullarının yoxluğu ilə daha da ağırlaşacaq.
Nature Food jurnalında dərc olunan araşdırmaya görə, ABŞ və Rusiya arasında baş verəcək nüvə müharibəsindən sonra yanan şəhərlərin kül və hisi atmosferə girərək günəş işığının qarşısını aldığı üçün 5 milyarddan çox insan aclıqdan həyatını itirə bilər.
Qeyd edilir ki, nüvə müharibəsi nəticəsində yaranan kül atmosferə daxil olduqda yaranacaq “qlobal iqlim soyutma effekti” ilə bir və ya iki il ərzində pik həddə çatacaq. Temperaturun azalması on ildən çox davam edəcək. Bir və ya iki il ərzində isə ortalama temperaturun 14,8 °C düşməsi müşahidə ediləcək. Tədqiqatçılar iqlim modellərindən istifadə edərək stratosferə nə qədər tüstü çatacağını temperaturu, yağışı ve günəş işığına necə təsir göstərəcəyini hesablayıblar. Açıqlamalara görə, hazırlanmış modellər yerdə və okeanda ekosistemin on illiklər ərzində qida üçün bərpa olunmayacağını göstərib.
Nəhayət, nüvə müharibəsinin iqlim təsirlərini modelləşdirən tədqiqatın həmmüəllifi Alan Robock hazırlanmış olan bütün simulyasiya və modellərdə qlobal sabitliyin mütləq şəkildə pozulduğunu bildirir. O, milyardlarla insanın nüvə müharibəsindən sonra qida təhlükəsizliyi səbəbindən öləcəyini və bu səbəbdən silahların qadağan edilməli olduğunu qeyd edir.
“Nüvə silahları varsa, onlardan istifadə edilməyəcəyinin sığortası yoxdur. Dünya bir neçə dəfə nüvə müharibəsinə yaxınlaşıb”, deyə Robok vurğulayıb. BMT-nin 5 illik nüvə silahlarının qadağan edilməsi haqqında müqaviləsini 66 ölkə qəbul edib, lakin 9 dövlət bu qərardan imtina edib.
