Brend, büdcəli POCO M seriyasını tanıtdıqdan bu yana modellərini vaxtaşırı yeniləməyi sevir. Belə ki, POCO M4 5G modeli ötən gün qlobal bazar üçün təqdim edilib. Smartfon sərfəli qiymətə giriş səviyyəsi üçün 5G dəstəyi təklif edir. Bu model bir neçə ay əvvəl Hindistan bazarında satışa çıxarılmışdı. Qlobal bazara gəldikdə isə kamera modulunda modifikasiya dəyişikliyi edilib.
Smartfon maraqlı arxa panel dizaynı alıb. Bunun hesabına Redmi Note 11E 5G modelinin təkrar brendləşdirilmiş variantı kimi görünmür. Yeni M4 5G modeli mavi, sarı və qara rənglərdə satışa çıxacaq. Kamera modulunun kənarları isə parlaq qara rəngli haşiyə ilə örtülüb. Ön tərəfin görünüşündə Redmi Note 11E 5G ilə müqayisədə heç bir dəyişiklik olmayıb. Selfi kamerası damla formalı çərtik dizaynı alıb.
POCO M4 5G modelinin texniki göstəriciləri
POCO brendinin yeni modeli MediaTek şirkətinin Dimensity 700 5G çipseti ilə təmin edilib. Bu çipset hal-hazırda smartfon bazarında ən büdcəli 5G çipset hesab edilir. Cihazın operativ yaddaş və yaddaş çipləri barədə məlumat verilmir. Ona görə də təkrar brendləşdirildiyi Redmi Note 11E 5G ilə eyni UFS 2.2 və LPDDR4x yaddaş texnologiyalarına sahib olduğunu təxmin edə bilərik. Smartfon 5000 mAs batareyasını 18 Vt ilə doldurmağı bacarır. Yeri gəlmişkən, qutudan çıxan adapter də 22,5 Vt sürətli şarj dəstəkləyir.
Kamera göstəriclərinə görə yeni M4 5G modeli çox da güclü deyil. Smartfon ikili kamera konfiqurasiyasını özündə birləşdirir. 13MP əsas, 2MP dərinlik sensorları ilə təchiz olunub. Ön kameranın təsvir ölçüsü isə 5MP təşkil edir. Ona görə də cihazı əldə etsəniz, yüksək keyfiyyətli şəkillər gözləməyin. Qəribəsi odur ki, Hindistan bazarına göndərilən POCO M4 5G modeli 13MP əvəzinə daha keyfiyyətli 50MP ISOCELL JN1 sensoruna malikdir.
POCO brendi bu modelə 6,58 düymlük 90 Hz tezlikli IPS LCD ekran quraşdırıb. FHD+ təsvir ölçülü ekran Gorilla Glass qoruyucu şüşəsi qorunur, lakin hansı versiya olduğu qeyd olunmayıb. İki sim yuvasından da 5G dəstəkləyən model, Android 12 əsasında MIUI 13 interfeysi ilə təchiz ediləcək.
Smartfonun qiyməti
POCO brendi yeni modeli Avropa bazarı üçün 219 € başlanğıc qiymətlə təklif edir. Lakin ölkəmizdə bu cihazın M4 Pro 5G olaraq adlandırılan daha güclü versiyası minimum 400-500AZN aralığında əldə edilə bildiyindən, M4 5G satışa gələcəyi təqdirdə daha ucuz olmalıdır. Yəni rəsmi Avropa qiymətləri ilə hesablama etməməyiniz məsləhətdir.
POCO M3 modeli 6000 mAs həcmli batareya, yüksək keyfiyyətli stereo səs ucaldanlar və münasib qiyməti hesabına yaxşı satılırdı. Yeni M4 modelinə 90 Hz tezlikli ekran və 5G dəstəkli çipset quraşdıra bilmək üçün qeyd olunan üstünlüklərdən imtina ediblər. Hər halda büdcəli smartfon seçiminizdə bu modelə baxa bilərsiniz.
