Ötən həftə Amerikalı bir mühəndis olan Lennet Wouters, SpaceX şirkətinin Starlink peyklərini hack etməyi bacarmışdı. Tesla elektromobillərində bənzər şeylər etməklə tanınan mühəndis, Starlink peyklərinə sadəcə 25 dollar dəyərində olan avadanlıqla müdaxilə etmişdi. Həmin boşluqdan istifadə etmək üçün antenaya birbaşa texniki müdaxilə etmək lazım gəlirdi. Ona görə mühəndisin etdiyi hack metodu normal istifadəçilər üçün ciddi təhlükəsizlik problemlərinə səbəb yaratmırdı. Göründüyü qədərilə baş vermiş bu hal SpaceX şirkətinin də diqqətini çəkib. Bildirilir ki, Starlink peyk internetini hack edə bilənlərə yüksək miqdarda mükafat təklif ediləcək.
Starlink peyk internetini hack edə bilən şəxslər 1000 qat artıq mükafat qazanacaqlar
SpaceX şirkəti sanki 25 dollar mövzusunu eşidibmiş kimi, təhlükəsizlik boşluqlarının səviyyələrinə bağlı olaraq “bacarıqlı” şəxslərə 25000 dollara qədər ödəniş edəcək. Ən zəif təhlükəsizlik boşluğu üçün isə 100 dollar mükafat veriləcək.
Şirkətin açıqlamasında qeyd edilir ki, starlink peyklərindəki boşluqları görmək üçün etik hack addımları onlar üçün əhəmiyyət daşıyır. Çünki, SpaceX bu üsulla problemlərin qarşısını vaxtında ala bilir. Lennet Wouters tərəfindən göstərilən metod isə ilk dəfədir ki, SpaceX tərəfindən rəsmi olaraq qeydə alınır. Sistemlərində daha çox belə problemin olub-olmadığından əmin olmaq üçün şirkət təcrübəli şəxsləri mükafat ilə testlərə cəlb etməyə çalışır.
Bənzər bir addım bu yaxınlarda Apple şirkəti tərəfindən iOS 16 ilə bağlı “Lockdown Mode” funksiyasının hack edilməsi ilə bağlı atılmışdı. Lakin Apple şirkəti “Lockdown Mode” funksiyasından o qədər əmindir ki, mükafatı 2 milyon dollara qədər çıxarıb. Starlink peyklərində bu kimi boşluqlar çox ola biləcəyindən peykləri hack edə bilənlərin sayı arta bilər. Nəticədə ola bilsin ki, bu səbəbdən verilən mükafatın həcmi biraz kiçik tutulub.
İndiyə qədər 32 nəfər Starlink peyklərini hack etdiyi ilə bağlı mükafat alıb. Son 3 ayda isə şirkət ortalama olaraq qazananlara 973 dollar mükafat verib.
