Yeni məlumatlara əsasən NASA-nın James Webb kosmik teleskopu may ayının sonunda mikrometeoroidlər ilə toqquşub. Nəticədə 18 əsas güzgüdən birinə zərər dəyib. Hal-hazırda missiyanın komandası bu problemi aradan qaldırmaq üçün işlərə başlayıb. Amma NASA-nın sözlərinə görə, teleskop ciddi zədə almayıb və lazımı səviyyədə çalışmağa davam edir.
Mikrometeroidlər ilə toqquşma əslində qeyri-adi bir hadisə deyil və daimi baş verir. Təbii ki bu hadisələrin baş vermə ehtimalı mühəndislər tərəfindən ilkin mərhələlərdə nəzərə alınır.
James Webb teleskopunun güzgüləri nə qədər dözümlüdür?
NASA yeni teleskopun güzgülərininin örtüyünü kosmik zibillərin təsirinə tab gətirmək üçün qızıldan hazırlayıb. Eyni zamanda James Webb teleskopunun hazırlanma mərhələsində bu tip çətinliklərə hazırlıqlı olması üçün güzgülər ilə bir çox simulasiyalar aparılmışdır. Həmçinin NASA mühəndisləri meteoroidlər gördükdə güzgülərin istiqamətini dəyişə bilir.
2021-ci ildə kosmosa göndərildikdən sonra, James Webb missiyasının komandası indiyənə qədər dörd kiçik toqquşma qeydə alıb. Lakin may ayında teleskop ilə toqquşan mikrometeorid, gözləniləndən daha böyük olub. Bu meteorid C3 seqmentinin əsas güzgüsü ilə toqquşub.
NASA yaranan çətinliyə hazır deyildi
NASA tərəfindən verilən məlumata əsasən, simulasiyalarda istifadə edilən modellər bu ölçüdə mikrometeoridləri nəzərdə tutmurdu. Həmçinin bu mikrometeorid ümumi meteorid axınının bir hissəsi deyildi və bu səbəbdən onu öncədən görmək mümkün olmayıb. Rəsmi məlumata görə, James Webb ilə qeyd edilən toqquşma 23-25 may tarixləri arasında baş verib. Mühəndislər isə toqquşmanın nəticələrini təhlil etməyə davam edir.
NASA agentliyi yeni mühəndis komandasının yaradıması üzərində çalışır. Bunlar gələcəkdə baş verə biləcək bu tip hadisələrin qarşısını almaq və ya toqquşma nəticələrini minimuma endirmək ilə məşğul olacaqlar. Mühəndislər zədələnmiş güzgü ilə bağlı tənzimləmər aparır. Amma bütün zədələnməni aradan qaldırmaq mümkün olmayacaq.
James Webb teleskopun zədələndikdə tam təmiri mümkün deyil
Hubble teleskopundan fərqi olaraq James W. kosmik teleskopuna müntəzəm texniki xidmət göstərmək mümkün olmayacaq. Yəni 10 milyard dollar dəyərində və 20 il ərzində hazırlanmış teleskopda hər hansı nasazlıq baş verərsə, onu yalnız uzaqdan təmir etmək üçün yollar axtarılacaq. Texnologiya bizim zamanda nə qədər sürətlə inkişaf etsədə, hal-hazırda James Webb teleskopunun təmiri üçün nə insan nədəki robotlaşdırılmış kosmik gəmi göndərmək mümkün deyil.
Bu təbii ki, sonuncu belə hadisə olmayacaq. Lakin baş vermiş hadisə elmi proqramın gedişatına heç bir təsir göstərməyəcək. 12 İyul tarixində bizi James Webb tərəfindən göndəriləcək ilk və tam rəngli görüntülər gözləyir. Bu görüntülərin çox möhtəşəm olacağına şübhəmiz belə yoxdur.
