Çin, Ay tədqiqatları ilə bağlı sadəcə 2 gündə 2 mühüm uğura imza atıb. Belə ki, nəhəng ölkənin kosmos tədqiqatları fasiləsiz olaraq davam edir. Çin iyunun 2-də Chang’e-6 adlı pilotsuz kosmik gəmisini Ayın qaranlıq səthinə/qaranlıq tərəfinə endirməyi bacarıb. İyunun 4-də Chang’e-6-da robot qol və qazma sistemi vasitəsilə tarixdə ilk dəfə tədqiq edilməmiş bölgədən fiziki nümunələr toplayıb.
Bu nümunələri xüsusi ötürmə sistemi ilə orbitə çıxaran və onları Yerə qaytarmaq üçün hazırlayan Çin Ay tədqiqatları çərçivəsində başdan sona problemsiz bir missiyanı yerinə yetirərək 2 gündə 2 mühüm uğura imza atıb. Əldə edilən nümunələrdən Ayın tarixi ilə bağlı mühüm məlumatlar əldə etməyi ümid edən Çin, Ayda araşdırma aparan yeganə ölkə deyil. Məsələn, Hindistan bundan əvvəl Ayda mühüm uğur qazanmışdı. Belə ki, Hindistan handrayaan-3 adlı kosmik gəmi ilə Ayın Cənub Qütbünə yaxın yerə enən ilk ölkə olmağı bacarıb. Bu uğurla Hindistan Aya yumşaq eniş edən dördüncü ölkə olmuşdu.
Qeyd edə ki, ABŞ, Sovet İttifaqı və Çin əvvəllər Aya yumşaq eniş edə bilmişdilər. Açıqlamaya görə, Chandrayaan-3-ün məqsədlərindən biri su əsaslı buzları kəşf etməkdir ki, alimlər bu buzun gələcəkdə Ayda insanların məskunlaşmasına dəstək verə biləcəyini bildirirlər. Təbii ki, bu uğuru qazanmaq asan deyil. Məsələn, keçən il Rusiya bu prosesdə uğursuzluğa düçar oldu. Roskosmosun rəsmi Telegram kanalında yayımlanan açıqlamaya görə, Rusiya kosmik gəmisi Luna-25-in orbitini azaltmaq üçün avqustun 19-da həyata keçirilən manevr zamanı yaranan anomaliya kosmik gəminin Ay səthinə çırpılmasına səbəb olub.
