Proqram təminatı nəhəngi olan Microsoft son dövrlərdə olduqca çətin günlər yaşayır. Belə ki, şirkət hələ də işçi ixtisarlarına davam edir. Bu dəfə Microsoft HoloLens və Azure komandalarının da yer aldığı 1000 nəfərlik işçisini ixtisara salıb.
Microsoft-un işçi qüvvəsinin optimallaşdırılması, daha dəqiq desək, ixtisarları davam edir. Microsoft-un təsdiqlədiyi kimi, proqram nəhənginin şirkətin qarışıq reallıq komandaları da daxil olmaqla ümumilikdə 1000-dən çox insanı işdən çıxaracağı bildirilir. Xatırladaq ki, şirkət ötən il 10 min insanı işdən çıxarıb. Microsoft sözçünün açıqlamalarına görə, şirkət qarışıq reallıq təşkilatını yenidən strukturlaşdırır. Məlum olduğu kimi, Microsoft IVAS proqramı çərçivəsində ABŞ Müdafiə Nazirliyi üçün hərbi HoloLens qulaqlıqları hazırlayırdı. Şirkət IVAS-a tam sadiq olduqlarını bəyan edir və ən son texnologiyanı təklif etməyə davam edəcəklərini bildirir. Microsoft, daha geniş qarışıq reallıq aparat ekosisteminə çatmaq üçün W365-ə investisiya qoymağa davam edəcəklərini, eyni zamanda HoloLens 2-ni satmağa davam edəcəklərini də vurğulayır.
Keçən il Microsoft-un kütləvi ixtisarı zamanı baş direktor Satya Nadella şirkətin aparat portfelinin dəyişdiyini bildirmişdi. O vaxtdan bəri Microsoft Activision-Blizzard-ın satın alınmasını tamamlayıb, OpenAI ilə süni intellektə böyük sərmayə qoyub və bu yaxınlarda Qualcomm çipləri ilə Copilot Plus PC markasını təqdim edib. Şirkətin hazırkı ixtisarları əsasən qarışıq reallıq bölməsində olsa da, bir neçə yüz insan Azure tərəfində də yollarını ayırır. Xatırladaq ki, HoloLens 2 2019-cu ildə böyük ümidlər və gələcək arqumentlərlə təqdim edilmişdi. Bəli, şirkət hələ də onları satacağını deyir, lakin heç bir bəyanatında yeni versiyadan bəhs edilmir. Əslində proqram nəhəngi hətta bir neçə ay əvvəl Windows Mixed Reality proqramını istifadədən çıxarmışdı. Ötən ilin əvvəlində virtual reallıq və HoloLens-in arxasında duran demək olar ki, bütün komandalar işdən çıxarıldı. Bununla da HoloLens layihəsinin uğursuz olduğunu açıq-aydın ifadə edə bilərik.
