Günəş panellərinin sıradan çıxması həm ənənəvi silikon, həm də perovskit məhsulları üçün ümumi bir hadisə hesab olunur. Perovskit panellər daha aşağı istehsal xərcləri və çevik quruluşları səbəbindən daha ümidverici hesab olunur, amma nəmə və istiliyə məruz qaldıqda tez bir zamanda sıradan çıxırlar. Canon, perovskit günəş panellərinin ömrünü iki qat artıraraq 20 və ya 30 ilə çıxaran bir örtük hazırlayıb.
Qeyd edək ki, Canon, patentli örtüyü istifadə etdikdən sonra perovskit günəş panellərinin ömrünün ən azı iki dəfə artmasını gözləyir. Qalınlığı 100-200 nm arasında dəyişəcək olan örtük perovskitdən hazırlanmış günəş panellərinin qulluq və təmir ehtiyaclarını da əhəmiyyətli dərəcədə azaldacaq. Yapon istehsalçıları perovskit günəş panellərinin hazırlanmasında liderdirlər və buna görə də çinli rəqibləri üzərində texnoloji üstünlük əldə etməklə kütləvi istehsala daha tez nail olmağa ümid edirlər. Çin istehsalçıları adi silikon günəş panelləri seqmentində artıq Yapon istehsalçılarını üstələyiblər, buna görə də Yaponiya sənayesi perovskitin tətbiqi sayəsində bu rəqabətdə üstünlüyü ələ almağı ümid edir.
Canon, günəş panelləri üçün örtük hazırlayarkən, lazer printerlərin istehsalında mühüm bir komponent olan fotoreseptor yaratma sahəsindəki təcrübəsindən faydalanıb. Maraqlısı budur ki, şirkət, perovskit günəş panelinin ixtiraçısı Tsutomu Miyasaka ilə də məsləhətləşib. Canon, qoruyucu örtüyü 2025-ci ildə Fukui Prefecture-dəki fabrikində kütləvi olaraq istehsal etməyi planlaşdırır. Habelə, on ildən sonra Canon bu məhsulun satışından on milyonlarla dollar gəlir əldə edəcəyini düşünür. Fortune Business Insights, qlobal perovskit günəş panelləri bazarının 2032-ci ilə qədər mövcud səviyyələrdən 36 dəfə artaraq 6,58 milyard dollara çatacağını proqnozlaşdırır. Yaponiya hakimiyyət orqanları ölkədə perovskit günəş panellərinin istehsalının yaxşılaşdırılmasına yönəlmiş böyük subsidiyalar nəzərdə tutub. Görünən odur ki, yaxın 10 ildə günəş paneli sənayesi böyük dəyişikliklərə məruz qalacaq.
