Pensilvaniya Universitetinin tədqiqatçıları saniyədə təxminən 2 milyard təsviri emal edə bilən yeni güclü optik çip hazırlayıblar. Yeni çip, kompüterlərdə istifadə olunan ənənəvi çiplərdən fərqli olaraq yaddaş komponentlərə ehtiyac duymadan məlumatları işıq kimi emal edən neyron şəbəkəsinə sahibdir.
Yeni çipin əsasını neyron şəbəkəsi, beynin məlumatı emal etmə üsulu kimi modelləşdirilmiş sistem təşkil edir. Bu şəbəkələr neyronlar kimi bir-birinə bağlanan qovşaqlardan ibarətdir. Onlar şəkillərdəki obyektləri və ya nitqdəki sözləri tanımaq kimi məlumatlar üzərində təlim edilərək, həqiqi beyinlərə bənzər şəkildə öyrədilirlər. Zaman keçdikcə bu “vəzifələrdə” daha yaxşı olurlar.
Yeni çip informasiyanı elektrik siqnalları kimi yox işıq şəklində emal edir. Çip neyronları hər biri müəyyən bir təsnifat növü üzrə ixtisaslaşmış çoxsaylı təbəqələrdə yığılmış optik naqillərdən istifadə edir.
Komanda 9,3 mm 2 ölçülü bir çip düzəldib və hərflərə bənzəyən bir sıra əlyazma simvollarını kateqoriyalara ayıraraq test edib. Müvafiq məlumat dəstləri üzərində təlim keçdikdən sonra çip iki növ simvoldan ibarət dəstlər üçün şəkilləri 93,8 faiz, dörd növ üçün isə 89,8 faiz dəqiqliklə təsnif edə bilib.
Ən əsası da odur ki, beyinə bənzər optik çip hər simvolu 0,57 nanosaniyə ərzində kateqoriyalara ayıra bilib ki, bu da ona saniyədə 1,75 milyard təsviri emal etməyə imkan verir. Komanda deyir ki, bu sürət çipin informasiyanı işıq kimi emal etmək qabiliyyətindən irəli gəlir və bu, ona mövcud kompüter çipləri ilə müqayisədə bir sıra üstünlüklər verir.
Tədqiqatın aparıcı müəllifi Firooz Aflatouni, “Bizim çipimiz məlumatı “computation-by-propagation” adlandırdığımız üsulla emal edir, yəni sadə sistemlərdən fərqli olaraq, hesablamalar işığın çip vasitəsilə yayılması şəklində baş verir. Həmçinin optik siqnalları elektrik siqnallarına çevirmək addımını atlayırıq, çünki çipimiz optik siqnalları birbaşa oxuya və emal edə bilir və bu dəyişikliklərin hər ikisi çipimizi əhəmiyyətli dərəcədə daha sürətli texnologiya edir.”
Digər bir üstünlük ondan ibarətdir ki, emal olunan məlumatın saxlanmasına ehtiyac yoxdur. Yaddaşa məlumat göndərməyərək vaxta qənaət edilir və ənənəvi çiplərdəki yaddaş komponentlərinə ümumiyyətlə ehtiyac duymur. Komanda həmçinin deyir ki, məlumatların saxlanmaması da daha təhlükəsizdir. Çünki bu, mümkün sızmaların qarşısını alır.
Komanda üçün növbəti addım çipin ölçüsünü böyütmək və texnologiyanı digər məlumat növlərini emal etmək üçün uyğunlaşdırmağa başlamaqdır. Bəs siz bu mövzu haqqında nələr fikirləşirsiniz? Fikirlərinizi bizimlə bölüşməyi unutmayın!
