Flaqman smartfonlardakı isinmə və yüksək enerji sərfiyyatı kimi hallar daim gündəmdədir. Çipset istehsal edən şirkətlər bu problemlərin üstəsindən gəlmək üçün son vaxtlar daha çox əmək sərf edirlər. Bununla bağlı ən çox çalışan şirkətlərdən biri də Qualcomm-dur. Qualcomm, Son 2 ildə Snapdragon 8XX seriyasında yaşanan çətinliklər həll olsun deyə Snapdragon 8+ Gen 1 çipsetində istehsal prosesini belə yenidən TSMC ilə əvəzlədi. Snapdragon 8 Gen 1 çipseti ilə aralarında çox qısa vaxt aralığı olduğundan şirkətin bu addımı o qədər də müsbət qarşılanmadı. Bu ilin birinci yarısı Snapdragon 8 Gen 1 ilə smartfon alanların çoxu sadəcə bir neçə ay sonra çıxacaq Snapdragon 8+ Gen 1 çipsetinin enerji sərfiyyatı cəhətdən belə bir fərq yaradacağını təxmin etmirdilər. İndi isə Snapdragon 8 Gen 2 barədə yeni detallar sızdırılıb.
Snapdragon 8 Gen 2 tamamilə yeni nüvə düzülüşünə sahibdir!
Belə ki, Snapdragon 8 Gen 2 barədə ilk detallar Digital Chat Station tərəfindən paylaşılıb. İnsayderin verdiyi məlumata görə SM8550-Kailua kod adına sahib Snapdragon 8 Gen 2 çipseti tamamilə yeni nüvə düzülüşünə sahib olacaq. Bəli, doğru oxudunuz. İndiyə qədər 1 ədəd yüksək performans, 3 ədəd performans və 4 ədəd aşağı performanslı nüvələrdən istifadə edilirdi. Lakin Snapdragon 8 Gen 2 çipsetində 1+3+4 nüvə düzülüşünün 1+2+2+3 ilə əvəzlənəcəyi sızdırılıb.
İnsayder bu nüvələri 1 x Makalu-Elp + 2 x Makalu + 2 x Matterhon + 3 x Klein R1 olaraq adlandırır. Həmin nüvələr uyğun olaraq 1 ədəd Cortex-X3, 2 ədəd Cortex-A720, 2 ədəd Cortex-A710, 3 ədəd Cortex-A510 olacaq. Qrafik çipi isə Adreno 740 olaraq qeyd edilir. Əlavə olaraq qeyd edək ki, Cortex-A720 və Cortex-X3 nüvələri öz sələfləri ilə müqayisədə 30% daha yüksək performans verməlidir.
Snapdragon 8 Gen 2 çipseti TSMC tərəfindən istehsal edilməyə davam edəcək. Üstəlik 3nm istehsal prosesinə keçid baş tutmayacaq. Qualcomm şirkəti TSMC əsaslı 4nm istehsal prosesinin effektivliyindən yararlanmağa davam edəcək. Üstəlik çipset arxitekturasında da edilən bu dəyişiklik böyük bir ehtimalla bir çox problemi həll edə bilər. Ən maraqlı tərəfi isə Samsung Galaxy S23 seriyasında baş verəcəklərdir.
Exynos 2300 çipsetində Samsung-un 3nm texnoloji prosesinə keçid ediləcək. Nüvə düzülüşündə isə heç bir dəyişiklik edilməsi gözlənilmir. Yəni indiyə qədər standart formada edilən yüksəltmələr ediləcək. Snapdragon 8 Gen 2 tamamilə fərqli konfiqurasiyaya malik olacaq. İkili çipset strategiyası davam etsə balansın nə dərəcədə qorunacağı, çipsetlərin bir-birindən nə qədər fərqlənəcəyi əsl müzakirə mövzusudur. Snapdragon 8 Gen 2 çipseti Xiaomi 13 seriyasında bu ilin oktyabr ayı, hər zaman çıxarıldığı tarixdən daha tez təqdim edilə bilər.
