Hər gün bir-birindən qəribə görünüşə malik yeni elektromobillər görməyə davam edirik. Belə ki, Avatr brendi Çinin nəhəng avtomobil istehsalçısı Changan və ötən gün smartfon istehsal edəcəyini dediyimiz NIO şirkətinin ortaq bir məhsulu kimi 2018-ci ildə yaradılıb. Sonralar NIO şirkəti Avatr brendindən tamamilə uzaqlaşaraq öz elektromobillərinə fokuslanıb. Avatr isə Changan, batareya texnologiyaları istehsalçısı CATL və Huawei şirkətlərinin ortaq işlədiyi toplama bir elektromobil markasına çevrilib. Brendin Avatr 11 modeli bu həftədən etibarən satışa çıxarılıb və 2023-cü ildən etibarən əlçatan olacaq.
Yeni Avatr 11 modelinin eksteryer və interyer dizaynı
Elektromobilin dizaynından çox danışmağa ehtiyac yoxdur. Çünki, həqiqətən dizaynerlər unikal bir iş çıxara biliblər. Eksteryerdə ilk diqqətimizi çəkən şey ön tərəfdə “yırtıcı” hissiyat qatan və bir o qədər də innovativ görünməsini təmin edən LED işıqlardır. Ənənəvi raditor barmaqlığı olmasa da sanki, aşağı hissədə batareya paketinin soyudulması üçün müəyyən boşluq qoyulub. “Yumurta” kimi görünən gövdəsi elektromobili kiçik göstərsə də krossover tam olaraq 4.880 mm uzunluğa, 1.970 mm enə sahibdir. Bu rəqəmlər isə təqribi Toyota Landcruiser Prado ilə bənzər ölçülərə sahib olmaq deməkdir.
Yan tərəfdən baxdıqda isə qapı qulpları gizlədilmiş əzələli dizayn arxa hissəyə doğru qəribə görünüş alıb. Baqaj qapağına xüsusi dizayn verən mühəndislər elektromobilə aktiv arxa qanad quraşdırıblar. Böyük bir ehtimalla bu addım aerodinamik təsirləri yaxşılaşdırmaq üçün atılıb.
İnteryerə daxil olduqda isə Huawei Inside texnologiyaları bizi qarşılayır. 15,6 düymlük nəhəng multimedia ekranı HarmonyOS əməliyyat sistemi ilə işləyir. Ön paneldə mərkəzi ekrandan əlavə biri sürücünün, digəri sərnişinin qarşısında olmaqla 2 fərqli ekran da mövcuddur. Hansı ki, bu 2 ekrandan mərkəzə doğru uzanan hissədə ön panel “burulğanvari” üslubda birləşərək tamamlanıb. Eyni zamanda 14 səs ucaldana malik səs sistemi də mövcuddur.
Avatr 11 texniki cəhətdən hansı imkanlara malikdir?
Huawei Inside platforması elektromobili hərəkətə gətirən sistemdən tutmuş, salon daxilində bütün multimedia sistemlərini əhatə edən texnologiyadır. İlk növbədə bu platforma AVATRANS adı verilən 3 LIDAR və 34 sensordan ibarət 400TOPS emal gücünə sahib avtopilot sistemini özü ilə gətirir.
Daha sonra bu platformanın daxilinə DriveONE adı verilən elektrik mühərriki sistemi daxildir. Hansı ki, Huawei tərəfindən istehsal edilən tam ötürməli elektrik mühərriki ilə Avatr modeli 578 at gücü və 650 nm fırlanma anı (torque) hasil edilir. Öndəki elektrik mühərriki 195 kW, arxadakı elektrik mühərriki isə 230 kW gücə malikdir. Nəticədə 100 Km/s sürətini elektromobil sadəcə 3,98 saniyəyə toplaya bilir.
Mövzunun giriş hissəsində CATL şirkətindən bəhs etmişdik. Batareya paketi elə Avatr təsisçisi olan CATL tərəfindən təmin edilir. 90.38 KVs batareyası 555 Km, 116.79 kVs batareyası isə 680 Km məsafə qət etməyə imkan verir. Elektromobil 240 kW sürətli şarj (DC) ilə 10 dəqiqəyə 200 Km məsafə qət etməyi bacarır.
Elektromobilin qiymətinə gəldikdə başlanğıc qiyməti 51.800 dollar təşkil edəcək. Üst variantı isə 60.700 dollara qədər yüksələcək.
