Smartfon istehsalçıları elektromobil bazarına yönələrkən, elektromobil istehsalçıları da smartfon bazarı ilə maraqlanmağa başlayıb. Məsələn, Geely bu il Meizu şirkətini satın almışdı. Həmin satın almadan sonra Geely şirkəti və Meizu brendinin izləyəcəyi yol barədə dəqiq məlumat verilmədi. Lakin böyük bir ehtimalla avtomobil bazarında getdikcə böyüyən Geely, eyni zamanda smartfon bazarına yatırımlar edərək növbəti il smartfon bazara çıxaracaq. Digər bir tərəfdən isə Apple və Xiaomi kimi firmalar öz elektromobilləri üzərində işləyirlər. Yəni ümumilikdə texnologiya sahəsində ortaqlaşan bütün şirkətlər hər yerdə öz güclərini sınamağa çalışırlar. Verilən məlumata görə, Çinin ən güclü elektromobil istehsalçılarından olan NIO şirkəti də artıq smartfon sektoruna atılaraq yeni modelinin hazırlıqlarına artıq başlayıb.
NIO şirkəti Apple kimi ildə 1 dəfə smartfon təqdim etməyi planlaşdırır
Şirkətin rəhbəri William Li NIO şirkətinin yeni smartfonunda Apple strategiyasının birə-bir eynisini tətbiq etmək istədiyini açıqlayıb. Yəni NIO brendi altında istehsal ediləcək smartfon üst seqmentə aid olacaq və ildə yalnız 1 dəfə olmaqla təqdim ediləcək. Bunu OnePlus şirkətinin əvvəlki strategiyasına da bənzədə bilərsiniz.
Hansı ki, bir vaxta qədər OnePlus brendi yalnız üst seqment Android cihazlar istehsal edirdi. Lakin sonralar “brendi itirdik”. William Li ötən ay olan danışığında bildirmişdi ki, bazarı təhlil ediblər. Smartfon istehsalında hansısa çətinliklə qarşılaşmayıblar. Əsas çətinliyi isə keyfiyyətli smartfon istehsal etməkdə görüblər.
Smartfonun iddia edilən texniki xüsusiyyətləri
Hal-hazırda NIO elektromobillərinin multimedia sistemini və.s idarə edən çiplər Qualcomm şirkəti tərəfindən təmin edilir. NIO istehsalı smartfon da yenə Qualcomm texnologiyaları ilə istehsal ediləcək. Yəqin ki, söhbətin Snapdragon çipsetlərindən getdiyini təxmin edirsiniz. Verilən məlumata görə, NIO öz smartfonunda Snapdragon 8 Gen 2 çipsetindən istifadə edəcək.
İddia edilir ki, smartfon QHD+ 2K təsvir ölçülü qıvrımlı ekran panelinə sahib olacaq. Eyni zamanda ekrana ultrasəs yüksək sürətli barmaq izi sensoru və deşikli selfi kamerası quraşdırılacaq.
Sürətli şarj texnologiyaları cəhətdən də NIO brendi Qualcomm şirkətinin “Quick Charge” həllindən yararlanmalıdır. Belə ki, 100W sürətli şarj ilə 4500-4800 mAs arasında olacaq iki hüceyrəli batareyası təqribi 25 dəqiqə ərzində cihazı doldura biləcək.
2023-cü ildə təqdim edilməsi planlaşdırılan smartfonun qiymətinə gəldikdə isə, ortalama olaraq 1000 $ səviyyələrində olacağı gözlənilir. Sonda qeyd edək ki, “Nio Mobile Technologies Co Ltd” üçün NIO şirkəti 100,000,000 dollarlıq başlanğıc kapitalı ayırıb.
